დღეს 40 წელი შესრულდა მედიცინის ერთ-ერთი დიდი გამარჯვებიდან, ყვავილის აღმოფხვრიდან,- აღნიშნა დაავადებათა კონტროლის ეროვნული ცენტრის დირექტორმა ამირან გამყრელიძემ დღეს გამართულ ფეისბუქ ბრიგინგზე, – 1980 წელს ჯანდაცვის მსოფლიო ორგანიზაციის გენერალურმა ანსამბლეამ ყვავილის დაავადება მთელს მსოფლიოში დამარცხებულად გამოაცხადა.

ყვავილი გახლავთ მსოფლიოში ერთ-ერთი ყველაზე ძველი და ამავე დროს საშიში  დაავადება, რომელმაც მილიონობით ადამიანის სიცოცხლე შეიწირა. ყვავილი გახლავთ ინფექცია, რომლის წინააღმდეგაც მსოფლიოში პირველი ვაქცინა შეიქმნა. ვაქცინაცია და აცრები გახლავთ მედიცინისა და საზოგადოებრივი ჯანმრთელობის დაცვის ყველაზე დიდი მიღწევა. ვაქცინაციამ მილიონობით ადამიანის სიცოცხლე გადაარჩინა და ჩვენს მომავალ თაობას დღესაც იცავს.

ეს განსაკუთრებით მნიშვნელოვანია დღეს, როდესაც მთელი მსოფლიო კორონავირუსს ებრძვის. სამყარო დიდი იმედით უყურებს მეცნიერებას, როდის შეიქმნება COVID-19 საწინააღმდეგო ვაქცინა და ყველას დიდი იმედი გვაქვს, რომ ვაქცინა აუცილებლად იქნება.

ვაქცინაცია შედის მედიცინის ყველა დროის მიღწევათა სამეულში, ანტიბიოტიკებთან და ჰიგიენასთან ერთად. XXI საუკუნეში ჩვენ მოწმე ვიქნებით ახლადწარმოშობილი ინფექციური დაავადებებისა და ისევ და ისევ გვექნება იმედი, რომ ვაქცინა შეიქმნება.

კოვიდინფექციის გამო არ შეიძლება ჩვენი ბავშვების გეგმიური აცრები შევაჩეროთ, რადგან აცრები მომავალ თაობას იცავს. მადლობა ყველა იმ ადამიანს, ვინც ყვავილის აღმოსაფხვრელად იბრძოდა. ეს ბრძოლა 1959 წელს დაიწყო და 1980 წელს დიდი გამარჯვებით დაგვირგვინდა. ყვავილის ბოლო შემთხვევა მსოფლიოში 1979 წელს დაფიქსირდა.