ამ მომენტისთვის იმერეთში კორონავირუსზე გამოკვლეულია სასწრაფო-სამედიცინო დახმარების

ქუთაისის, თერჯოლის, ბაღდათის, ვანისა და ხარაგაულის ბრიგადები.

დაავადებათა კონტროლისა და საზოგადოებრივი ჯანმრთელობის დაცვის ეროვნული ცენტრის იმერეთის სამმართველოს უფროსის გოჩა გიორგიძის ინფორმაციით, პასუხები ეტაპობრივად გახდება ცნობილი. გუშინ გამოკვლეული ქუთაისის ბრიგადებიდან covid-19 არც ერთ მათგანს არ დაუდასტურდა.

„სიტუაცია საკმაოდ კარგად გაკონტროლდა და იმედია, რეკომენდაციებს მოსახლეობა შემდგომშიც დაიცავს, – ამბობს გოჩა გიორგიძე, – იმერეთში მაისში კორონავირუსით ინფიცირების არც ერთი შემთხვევა არ გვაქვს. სამაგიეროდ გამოჯანმრთელებულები კლინიკებს ყოველდღე ტოვებენ. ამჟამად ქუთაისის ინფექციურ საავადმყოფოში მკურნალობას ცხრა პაციენტი აგრძელებს.“

ხარაგაულის სასწრაფო-სამედიცინო დახმარების ბრიგადებს კორონავირუსზე ტესტირება დღეს ხარაგაულის საზოგადოებრივი ჯანდაცვის ცენტრის ექიმმა და ხარაგაულის საავადმყოფოს ლაბორატიის  გამგემ ჩაუტარეს. სულ გამოკვლეულია 36 პირი. ტესტირების პასუხები ხვალ გახდება ცნობილი.

საქართველოში ახალი კორონავირუსით ინფიცირებულთა 12,7% სამედიცინო სფეროს წარმომადგენელია.

ამჟამად საქართველოში კორონავირუსის 610 დადასტურებული შემთხვევაა. მათ შორის გამოჯანმრთელებულია 269 პირი, გარდაცვლილია 9 ინფიცირებული.

კარანტინის რეჟიმშია – 5133 მოქალაქე, სტაციონარში მეთვალყურეობის ქვეშ – 523.