პირველიდან მეთორმეტე კლასის ჩათვლით მოსწავლეებისთვის სხვადასხვა საგნებში იქმნება კომპლექსური საშინაო დავალებების კრებულები, რომლებიც ვებგვერდზე https://www.el.ge/ განთავსდება.

ახალი საგანმანათლებლო პროექტით მოსწავლეებს დისტანციურად შეეძლებათ საჭირო მასალის გაცნობა და დავალებების შესრულება.

ონლაინ პლატფორმაზე დავალებების პირველი კრებული ყოველი საგნის/საგნობრივ ჯგუფისათვის ხელმისაწვდომი იქნება მაისის პირველ კვირაში, ხოლო ყოველ მომდევნო კვირას მოსწავლეები მიიღებენ ახალ დავალებებს. აღნიშნული სასწავლო მასალები ხელმისაწვდომი იქნება მასწავლებლებისთვისაც.

ახალი საგანმანათლებლო პროექტი სკოლამდელი განათლების კომპონენტსაც მოიცავს. დაგეგმილია რეკომენდაციებისა და მრავალფეროვანი აქტივობების ტელეგადაცემებით შეთავაზება სკოლამდელი დაწესებულებების აღსაზრდელების მშობლებისთვის, რათა მათ ოჯახურ გარემოში განაგრძონ პატარების აღზრდა-განათლება.

დისტანციური სწავლების პროცესის მართვის მხარდასაჭერად სკოლების, მასწავლებლებისა და მშობლებისთვის შეიქმნება დისტანციური სწავლების გზამკვლევები.

პროექტის მიზანია სკოლამდელი და ზოგადი განათლების სფეროში განათლების უფლების დაცვისა და ხარისხიანი განათლების უზრუნველყოფა.

ახალი საგანმანათლებლო პროექტის განსახორციელებლად ურთიეთთანამშრომლობის მემორანდუმი საქართველოს განათლების სამინისტროს, გაეროს ბავშვთა ფონდს (UNICEF), განათლების კოალიციასა და განათლების მართვის საინფორმაციო სისტემას შორის გაფორმდა.

მემორანდუმი ითვალისწინებს ორგანიზაციებს შორის მჭიდრო კოორდინაციითა და თანამშრომლობით, ასევე, დიდი ბრიტანეთის მთავრობის, გუდავაძე-პატარკაციშვილის ფონდის, აღმოსავლეთ-დასავლეთის მართვის ინსტიტუტის (EWMI) ACCESS-სა და  „პირველი არხი – განათლების“ მხარდაჭერით, ახალი საგანმანათლებლო პროექტის ამოქმედებასა და ტექნიკურ უზრუნველყოფას.

წყარო