აპრილის შუა რიცხვებიდან, კორონავირუსის პანდემიის გამო, ხარაგაულის სალოტბარო სკოლა დისტანციურ სწავლებაზე გადავიდა.

ლოტბარი მაია მაღრაძე სკოლის ხუთ მოსწავლეს კვირაში სამჯერ უკავშირდება. ჯერ შესასწავლ სიმღერას უგზავნის, შემდეგ სიმღერას ხმების მიხედვით ცალ-ცალკე წერს და ისე აწოდებს.

მიცემულ მასალას მოსწავლეები ამუშავებენ და შესწავლილ სიმღერას აუდიო ფაილის სახით მასწავლებელს უბრუნებენ. მოსწავლეთა ხმები თავს ფოკლორის ეროვნულ ცენტრში იყრის.

ლოტბარ მაია მაღრაძეს მოსწავლეებთან ცოცხალი ურთიერთობა ურჩევნია, მაგრამ სწავლის პროცესის შეწყვეტაც არ შეიძლებოდა. ამიტომ საქართველოში მოქმედმა 30-მა სალოტბარო სკოლამ საქმიანობა დისტანციურად გააგრძელა.

სასწავლო წლის განმავლობაში ხარაგაულის სალოტბარო სკოლის მოსწავლეებს, ფოლკლორის ეროვნული ცენტრის პროგრამის თანახმად, 15 იმერული სიმღერა უნდა შეესწავლათ. მაია მაღრაძე ამბობს, რომ ახლა შედარებით რთულ სიმღერებს ამუშავებენ. თუმცა, პროგრამას ყველა მოსწავლე დაძლევს.

ხარაგაულის სალოტბარო სკოლაში სულ 16 მოსწავლეა. ონლაინ მეცადინეობები ფოლკლორის ცენტრის რეკომენდაციით, მხოლოდ 12 წლისა და მეტი ასაკის მოსწავლეებთან ტარდება.

ხარაგაულის სალოტბარო სკოლის მოსწავლე, ქეთი ლაცაბიძე ფოლკლორის ეროვნული ცენტრის დირექტორ გიორგი დონაძის „ონლაინგუნდშიც“ ჩაერთო. ამ გუნდის წევრობა სალოტბარო სკოლების 13 წელზე მეტი ასაკის მოსწავლეებს შეეძლოთ. კვირაში ერთხელ ცენტრის დირექტორი მათ ხალხური სიმღერის შესწავლის გარდა, თითოეულის ისტორიასა და მნიშვნელობას აცნობს.

ქეთი ლაცაბიძე ამბობს, რომ ონლაინ სწავლება ყველაფრის მომცველი ვერ არის. მას მასწავლებელთან და ჯგუფელებთან ცოცხალი ურთიერთობა ურჩევნია.

ხარაგაულში სალოტბარო სკოლა 2019 წლის მაისში ხალხური შემოქმედების სახლის ბაზაზე ფოლკლორის სახელმწიფო ცენტრის ინიციატივით შეიქმნა.

ნინო კაპანაძე

ფოტოებზე: ფოლკლორის ეროვნული ცენტრის გუნდის მოსწავლეთა ერთი ჯგუფი ცენტრის დირექტორ გიორგი დონაძესთან მეცადინეობის დროს;

ხარაგაულის სალოტბარო სკოლის მოსწავლეები ლოტბარ მაია მაღრაძესთან, სკოლის მენეჯერ დალი მაღრაძესთან და ფოლკლორის სახელმწიფო ცენტრის დირექტორის მოადგილე გიორგი გაბუნიასთან ერთად, 2019 წ.