ქვეყანაში საგანგებო მდგომარეობა რომ გამოცხადდა, ხარაგაულში, ბაზალეთის საჯარო სკოლის მასწავლებლებმა ფიქრია ტალახაძემ, თამარ კამკამიძემ და ბაზალეთის დეპუტატმა ვარლამ ჭიპაშვილმა სოციალური აქცია – „დავეხმაროთ ჩვენს სოფელს“ წამოიწყეს.

აქციის ორგანიზატორებმა იმ ადამიანების დახმარება გადაწყვიტეს, ვისაც კორონავირუსის პანდემიის გამო ეს ყველაზე მეტად სჭირდებათ.

– შექმნილი მდგომარეობის გამო რომ შვილებმა და შვილიშვილებმა სოფელში ჩამოსვლა ვერ შეძლეს, ბევრი ასაკოვანი ადამიანი მარტო დარჩა, – ამბობს თამარ კამკამიძე, – ამ აქციით მარტოდ დარჩენილების მიმართ ყურადღების გამოხატვა გადავწყვიტეთ.

სოციალურ ქსელში ინფორმაცია განვათავსეთ, საბანკო ანგარიში მივუთითეთ და თანხების მოძიება დავიწყეთ.

ვეხმარებით შეჭირვებულ ოჯახებს, მარტოხელა მოხუცებს, 70 წელს გადაცილებულ ადამიანებს; მათ, ვისაც გადაადგილება შეზღუდული აქვთ.

აქციაში ბევრი ბაზალეთელი ჩაერთო, ასევე შემოგვიერთდა ინდმეწარმე მაკა შველიძე, რომელმაც ბენეფიციარებისთვის სურსათი მოგვაწოდა“.

სოციალური აქციის ფარგლებში ორგანიზატორები როგორც თანხას, ასევე საკვებ პროდუქტებს აგროვებენ.

ამ ეტაპისთვის მოხალისეები სოფელ ბაზალეთში, ქროლში, წიფსა და ღარიხევში 25 ოჯახს დაეხმარნენ.

აქციის ერთ-ერთი ორგანიზატორი ფიქრია ტალახაძე ამბობს, რომ სოციალური აქცია ეტაპებად  მიმდინარეობს: „პირველად 7 აპრილს, ხარებას ვიყავით ოჯახებში, შემდეგ 24 აპრილს. მოხუცების გაღიმებული სახის დანახვა გვახარებს, სოციალურ პასუხისმგებლობას ვგრძნობთ და აქციას კვლავ ვაგრძელებთ“.

ბაზალეთის დეპუტატის, ვარლამ ჭიპაშვილის თქმით, ეპიდემიის დროს, ისე როგორც სხვა სოფლებში, ბაზალეთის თემშიც სხვადასხვა პრობლემა გაჩნდა: „სახელმწიფო ვალდებულია, რომ მოსახლეობაზე იზრუნოს, მაგრამ საბიუჯეტო სახსრებით ყველა პრობლემას ვერ მოაგვარებ. შესაბამისად, როცა ჩვენი სოფლის ახალგაზრდებმა ეს იდეა გამაცნეს, სიამოვნებით შევუერთდი.

სოფელი ბაზალეთი საკმაოდ მაღალი სოციალური პასუხისმგებლობით გამოირჩევა. ეს აქციაც ადამიანების კეთილ ნებასა და მაღალ სამოქალაქო შეგნებაზეა დაფუძნებული.

ძალიან გამჭვირვალედ შევარჩიეთ ოჯახები. შერჩევისას ერთმანეთის აზრს და მოსახლეობის მდგომარეობას ვითვალისწინებდით.

მინდა ყველას, ვინც გამოგვეხმაურა, გვერდით დაგვიდგა  და ეს საქმე დააფასა, დიდი მადლობა გადავუხადო. ვფიქრობთ, ერთად დგომით გაცილებით მეტს შევძლებთ.

ჩვენთვის მსგავსი ინიციატივა პირველი არ არის. 2013 წელს თბილისში წყალდიდობის შემდეგ, ბაზალეთის მოსახლეობამ სტიქიით დაზარალებულებს თანხა და საკვები პროდუქტები გაუგზავნა“.

აქციის ორგანიზატორების თქმით, სოციალური კამპანია „დავეხმაროთ ჩვენს სოფელს“ გრძელდება.

თამარ ჩხიკვაძე

აქციაში ჩართვის სურვილის შემთხვევაში გიზიარებთ საბანკო რეკვიზიტებს:
ანგარიშის ნომერი – GE29LB0711183255622000
მიმღები – თამარ კამკამიძე.