ამ თემას დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელი ხათუნა ზახაშვილი  ფეისბუქკონფერენციაზე შეეხო.

„ეს არის კიდევ ერთი საერთაშორისო რეკომენდაცია, რომელიც ბევრ ქვეყანაში არსებობს, – ამბობს ხათუნა ზახაშვილი, – რეკომენდებულია, რომ მძღოლი იჯდეს ცალკე და მასთან მცირედით უნდა იყოს ჩაწეული ფანჯარა, რაც იმ ტერიტორიის მაღალ აირაციას უზრუნველყოფს და ავტომობილში ცირკულაციას აუმჯობესებს.

რაც შეეხება ოჯახის წევრის მძღოლის გვერდით დაჯდომის აკრძალვას, როგორ უნდა შემოწმდეს, მძღოლის გვერდით მისი ოჯახის წევრი ზის თუ სხვა ადამიანი?! არაფერი არ დაშავდება, თუ სხვა მგზავრები უკანა სავარძელზე ისხდებიან. მერწმუნეთ, რისკები ასე უფრო შემცირდება.

მივყვეთ რეკომენდაციებს, რომ ამ ეპიდემიიდან მინიმალური დანაკარგებით გამოვიდეთ“.