კორონავირუსის პანდემიის გამო დაწესებული შეზღუდვების მოხსნა ეტაპობრივად მიმდინარეობს.

სილამაზის სალონების ამოქმედება, სავარაუდოდ, ივნისის დასაწყისიდან იგეგმება.

ხარაგაულში სილამაზის სალონ „ნონას“ მფლობელი ნონა ჭანკვეტაძე ამბობს, რომ, როგორც მისთვის ცნობილია, სალონის ამოქმედების შემდეგ, გარკვეული რეკომენდაციები უნდა შეასრულონ, რაც საკმაოდ დიდ ხარჯებთანაა დაკავშირებული.

„სალონების შესასვლელებში დეზობარიერები უნდა მოვაწყოთ, აუცილებლად უნდა გვქონდეს უკონტაქტო თერმომეტრი და ყველა შემომსვლელის ტემპერატურა სპეციალური აღრიცხვის ჟურნალში უნდა შევიტანოთ, – ამბობს ნონა ჭანკვეტაძე, – აუცილებელია დამცავი ფარების გაკეთება, პირბადისა და ხელთათმანების  გამოყენება. უნდა ავიყვანოთ ერთი დამხმარე ადამიანი, ვინც ამ ყველაფერს მოაწესრიგებს.

ამ ხარჯების გათვალისწინებით, სალონების ნაწილმა მომსახურების გაძვირების გადაწყვეტილება მიიღო. არ ვიცი, რას ვიზამ. ხარაგაულში ადამიანებს უჭირთ, მომსახურება როგორ გავაძვირო, მაგრამ ხარჯიც ძალიან იზრდება. მხოლოდ თერმომეტრის შეძენას 300-500 ლარი სჭირდება. თუ დამხმარეს ავიყვანთ, მასაც ხომ უნდა გადავუხადოთ ხელფასი. შეიძლება მომსახურებებზე ფასი ერთი ლარით გავზარდოთ, თუმცა, ჯერჯერობით, ესეც ვარაუდია“.

სილამაზის სალონის MA&GI მფლობელ მარი ნარსავიძეს, ჯერჯერობით, კომპეტენტური პირისგან რაიმე ზეპირი ან წერილობითი გაფრთხილება რეკომენდაციების შესახებ არ მიუღია.

მარი სალონის გახსნას აუცილებლად გეგმავს და ამბობს, რომ დამატებითი ხარჯების გამო მომსახურების ფასების გადახედვა მოუწევს.

თამთა გოგოლაძე