ხვალიდან, 5 მაისიდან, ბათუმსა და ქუთაისში გადაადგილებებზე შეღუდვები მოიხსნება. ამის შესახებ პრემიერ-მინისტრმა გიორგი გახარიამ დღეს მთავრობის სხდომაზე განაცხადა.

მთავრობის მეთაურის თქმით, შესაძლებელია კვირის ბოლომდე თბილისისა და რუსთავის გახსნის საკითხიც დადებითად გადაწყდეს, რაც ეპიდემიოლოგიურ ვითარებაზეა დამოკიდებული.

„მოგეხსენებათ, რომ რამდენიმე კვირის წინ, ჩვენ მივიღეთ იძულებული ღონისძიება, რომ ჩაგვეკეტა გარკვეული მსხვილი ქალაქები და დღეს შეგვიძლია ვთქვათ, რომ ხვალიდან ისეთ ქალაქებში, როგორიცაა ბათუმი და ქუთაისი, შეზღუდვები გადაადგილებებზე მოიხსნება, თბილისსა და რუსთავზე დარჩება გარკვეული შეზღუდვები და ეს პირდაპირ არის დაკავშირებული მომიჯნავე რაიონებში​ ეპიდემიოლოგიურ მდგომარეობასთან.

თუმცა, თბილისშიც და რუსთავშიც უახლოეს დღეებში ეპიდემიოლოგიური სიტუაციიდან გამომდინარე შესაბამისი გადაწყვეტილებები იქნება მიღებული. შესაძლებელია იმედი გვქონდეს, რომ კვირის ბოლომდე, თბილისისა და რუსთავის გახსნის საკითხიც დადებითად გადაწყდება“, – განაცხადა პრემიერ-მინისტრმა.

ქუთაისსა და ბათუმში, ისევე როგორც მთელს ქვეყანაში, ძალაში რჩება კომენდანტის საათი, ანუ, საღამოს 9 საათიდან დილის 6 საათამდე გადაადგილება აკრძალულია.

ასევე, ძალაშია რეკომენდაციები, რომლებიც ავტომანქანით გადაადგილებას შეეხება. აკრძალულია, მძღოლის ჩათვლით სამ პირზე მეტის გადაადგილება მსუბუქი ავტომანქანით. ამასთან, მძღოლის გარდა ორი მგზავრი აუცილებლად უკანა სავარძლებზე უნდა მოთავსდნენ, მძღოლის გვერდით ადგილი კი თავისუფალი უნდა იყოს.