ხარაგაულში ბორის სკოლის ბაზაზე მოქმედი პანსიონის 14 მოსწავლე, კორონავირუსის პანდემიის გამო, საკუთარ ოჯახში იმყოფება.

არც ერთ მათგანს ინტერნეტთან წვდომა არ აქვს. ამიტომ მათ მასწავლებლები გაკვეთილებს ტელეფონით უხსნიან.

ბორის სკოლის მასწავლებლები და დირექტორი მაია გაგოშიძე ამბობენ, რომ გაკვეთილის ასეთი ფორმით ჩატარება ძალიან რთულია; ინტერნეტზე ხელმიუწვდომლობა კი სერიოზული პრობლემაა. ტელეფონით მოსწავლეთა გამოკითხვა, ფაქტობრივად, უშედეგოა.

ბორში პანსიონური მომსახურების მიმღებ 14-ვე მოსწავლეს მარტში დაურიგდა ის საკვები პროდუქტები, რითაც მათი ყოველდღიური სამჯერადი კვებისთვის საჭმელი უნდა მომზადებულიყო. აპრილში კი საკვები პროდუქტები ამ მოსწავლეებმა ორჯერ მიიღეს.

ბორის პანსიონში მოსწავლეთა კვებას ა/ო „ქუთაისის მოზარდთა სახლი“ აფინანსებს.

გარდა პანსიონური მომსახურების მიმღები მოსწავლეებისა, „ქუთაისის მოზარდთა სახლმა“ აპრილში ორჯერ საკვები პროდუქტები – 3-3 კგ პურის ფქვილი და შაქარი, 4, 5 კგ ლობიო და 3 ლ ზეთი – ბორის სკოლის ყველა მოსწავლესა და თანამშრომელს გადასცა. სულ საკვები პროდუქტები 178-მა პირმა მიიღო.

ა/ო „ქუთაისის მოზარდთა სახლი“ ანალოგიურ აქციას მაისშიც გეგმავს.

ბორში პანსიონი 1961 წლიდან მოქმედებს. ის თავიდან კიცხის სკოლა-ინტერნატის სახელით იყო ცნობილი.

ნინო კაპანაძე

ფოტოზე: ბორის საჯარო სკოლა