დაავადებათა კონტროლის ეროვნული ცენტრი პერიოდულად ოფიციალურ ფეისბუქგვერდზე ბრიფინგებს მართავს.

უწყების ხელმძღვანელი პირები კორონავირუსთან დაკავშირებით მოქალაქეებისგან გაგზავნილ შეკითხვებს პასუხობენ.

რა შემთხვევაში შეიძლება კოვიდინფიცირებულმა ბინაზე იმკურნალოს.

ამ საკითხზე დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელი ხათუნა ზახაშვილი განმარტავს, რომ კოვიდინფიცირებულის ბინაზე მკურნალობა მხოლოდ ინფიცირებულის სურვილზე არ არის დამოკიდებული.

-ინფიცირებული პაციენტი სრულად იზოლირებული მხოლოდ საავადმყოფოშია, – ამბობს ხათუნა ზახაშვილი, – შესაბამისად, ძალიან მნიშნელოვანია, რომ ყველა პაციენტი, სანამ ჯანდაცვის სისტემას აქვს ამის შესაძლებლობა, უმჯობესია იყოს იზოლირებული საავადმყოფოში.

სამომავლოდ, მუდმივად არსებობს იმის მოლოდინი, რომ პაციენტთა რაოდენობამ მოიმატოს და თუკი ჯანდაცვის სისტემა საავადმყოფოებში თითოეული პაციენტის იზოლაციას ვეღარ შეძლებს, არის გაწერილი პროტოკოლი, რომ მსუბუქი პაციენტები ბინაზე დარჩნენ და არასაავადმყოფო პირობებში, თუმცა იზოლირებულად, იმკურნალონ.

ინფიცირების მსუბუქ შემთხვევების დროს შესაძლებელია, რომ ავადმყოფმა მკურნალობა თავისი უბნის ან პირადი ექიმის მეთვალყურეობით გააგრძელოს.

ამჟამად საქართველოში კოვიდინფიცირებული ერთი პაციენტი მკურნალობს ბინაზე.