განათლების სამინისტროს სკოლამდელი და ზოგადი განათლების განვითარების დეპარტამენტის უფროსი ლალი კალანდაძე საბავშვო ბაღების აღმზრდელებს რეკომენდაციით მიმართავს:

-ქვეყანაში შექმნილი საგანგებო მდგომარეობიდან გამომდინარე, საგანმანათლებლო დაწესებულებები, სამინისტროს მხარდაჭერით, მუშაობას დისტანციურ რეჟიმში აგრძელებენ, – აღნიშნულია სარეკომენდაციო წერილში, – იმისათვის, რომ არ შეფერხდეს სკოლამდელი ასაკის ბავშვების განათლება და განვითარება, დირექტორებმა და აღმზრდელებმა, შესაძლებლობის ფარგლებში, გააგრძელონ დისტანციური საკომუნიკაციო არხების გამოყენებით, მშობლებთან კავშირი საგანმანათლებლო-განმავითარებელი ელექტრონული რესურსების მიწოდებისა და კონსულტირების გზით.

კერძოდ, ბავშვის შესაძლებლობისა და ინტერესების გათვალისწინებით,

შესთავაზონ მშობლებს კონკრეტული თამაშები და აქტივობები; მიაწოდონ იდეები საინტერესო და ყოველდღიურობაში ადვილად განსახორციელებელ საქმიანობებთან დაკავშირებით;
კონსულტაციები განხორციელდეს მშობლების მხარდასაჭერად, სახლში ყოფნის პერიოდში ბავშვებთან დროის უფრო საინტერესოდ გატარების მიზნით.

სკოლამდელი განათლების მიმართულებით შექმნილი ელექტრონული რესურსების ნახვა, რაც სასარგებლო იქნება აღმზრდელებისა და მშობლებისათვის, შესაძლებელია EL.GE – ელექტრონული საგანმანათლებლო რესურსების პორტალზე: https://el.ge/ და აგრეთვე, ბმულზე: www.preschooleducation.ge

შექმნილი ვითარებიდან გამომდინარე, ბავშვების ხანგრძლივი პერიოდით სახლში ყოფნის პირობებში, ხშირად ისინი დიდ დროს ატარებენ ეკრანებთან, რაც მავნებელია მათი ჯანმრთელობისა და განვითარებისათვის.

გასათვალისწინებელია პედიატრების, ადრეული განვითარების სპეციალისტების, ფსიქოლოგთა რჩევები და მშობლების ინფორმირებულობა: ვაკონტროლოთ ბავშვების მიერ ეკრანებთან გატარებული დრო და შინაარსი, რათა ბავშვი არ გახდეს დამოკიდებული გაჯეტებზე.

სპეციალისტების რეკომენდაციის მიხედვით, დღე-ღამეში 3-7 წლის ასაკის ბავშვის მიერ ეკრანთან გატარებული დრო არ უნდა აღემატებოდეს ნახევარ საათს. ხოლო 2 წლამდე ასაკის ბავშვებთან საერთოდ არ არის რეკომენდებული ეკრანის გამოყენება. ეკრანთან ნორმაზე მეტი დროის გატარების შემთხვევაში, შესაძლებელია გამოვლინდეს აგზნება, უძილობა, აგრესია ეკრანთან მოშორების ან შესვენების მოთხოვნაზე, თავისა და თვალის ტკივილი და სხვა აქტივობებში ჩართვაზე უარი.

საგულისხმოა არასრულწლოვანი ბავშვების პერსონალური მონაცემების დაცვა, რაც ითვალისწინებს ბავშვის აქტივობების ამსახველი სხვადასხვა მასალის (ფოტო, ვიდეო გამოსახულება) გასაჯაროვებას. არასრულწლოვანის მონაცემების ინტერნეტში ყველასთვის ხელმისაწვდომი ფორმით გასაჯაროებამ, შესაძლოა, არასასურველი ზეგავლენა მოახდინოს არასრულწლოვანზე (გახდეს ბულინგის ან სხვა სახის არასასურველი მოპყრობის ობიექტი). შესაბამისად, დაწესებულების ადმინისტრაციამ, აღმზრდელებმა, მშობლებმა და ოჯახის წევრებმა უნდა გაითვალისწინონ აღნიშნული გარემოება და იმოქმედონ ბავშვის საუკეთესო ინტერესების შესაბამისად.

ამასთანავე, სამინისტრო მხარდაჭერას უცხადებს ყველა იმ მუნიციპალიტეტს, რომლებმაც გადაწყვეტილება მიიღეს საბავშვო ბაღებში სასწავლო პროცესის აღდგენამდე, სახლში გაატანონ მშობლებს ის არამალფუჭებადი პროდუქტები, რომლებიც მიმდინარე პერიოდში ბავშვთა კვებისთვის უნდა გამოეყენებინათ საბავშვო ბაღებში.

არსებულ რთულ ვითარებაში მნიშვნელოვანია ყველა ის ქმედება, რომელიც ბავშვთა კეთილდღეობას, მათ განათლებასა და განვითარებას ხელს შეუწყობს.

განათლების, მეცნიერების, კულტურისა და სპორტის სამინისტროს მიერ, საზოგადოებრივ მაუწყებელთან თანამშრომლობით, დისტანციური სწავლების ხელშესაწყობად, მიმდინარეობს სატელევიზიო პროექტი „ტელესკოლა“, რომლის ფარგლებში სკოლის მოსწავლეებისთვის სხვადასხვა საგანში ტარდება სახალისო გაკვეთილები. უახლოეს ხანში ტელეგაკვეთილებს დაემატება სკოლამდელი განათლების აქტივობებიც.

გისურვებთ მშვიდობას და ჯანმრთელობას!