თვითდასაქმებულთა აღრიცხვიანობა პრობლემაა, – განაცხადა საქართველოს პრემიერ-მინისტრმა გიორგი გახარიამ ანტიკრიზისული გეგმის წარდგენის შემდეგ ჟურნალისტებთან გამართულ ბრიფინგზე.

პრემიერ-მინისტრის განმარტებით, სოციალური დახმარების სააგენტოს აქვს სპეციალური პროტოკოლი, რომლის მიხედვითაც, არაფორმალურად დასაქმებულები უმარტივესი გზით მიიღებენ დახმარებას, როგორც კი შეძლებენ დაადასტურონ რაიმე სახის შემოსავალი.

„ეს შეიძლება იყოს დამლაგებლისთვის ორგანიზაციის წერილი, სადაც ის ალაგებდა, მოვაჭრისთვის იმ ბაზრობის ადმინისტრაციის წერილი, სადაც ის შრომობდა, რაიმე სახის გადასახადები საბანკო ანგარიშიდან, რაც ადასტურებს, რომ ამ ადამიანს 2020 წლის პირველ კვარტალში შემოსავალი უფიქსირებოდა. ჩვენთვის ეს საკმარისი იქნება, რომ ასეთი სახის სოციალური დახმარება გავცეთ“, – აღნიშნა გახარიამ.

პრემიერის განცხადებით, დახმარება შეეხება ადამიანებს, რომლებიც კომპანიამ უხელფასო შვებულებაში გაუშვა.

თვითდასაქმებულებს მთავრობა 300 ლარით ერთჯერადად დაეხმარება. ამ მიზნით ბიუჯეტიდან 75 მილიონი ლარის გამოყოფა იგეგმება.

კორონავირუსის პანდემიის გამო საქართველოში საგანგებო მდგომარეობა 21 მარტიდან 22 მაისის ჩათვლით მოქმედებს.