მთავრობის გადაწყვეტილებით, ავტომობილებით გადაადგილების შეზღუდვა 27 აპრილამდე გაგრძელდება.

„27 აპრილიდან გარკვეული შეზღუდვების მოხსნა იგეგმება, მათ შორის გადაადგილების შეზღუდვის მოხსნა, – განაცხადა პრემიერმინისტრის მრჩეველმა ირაკლი ჩიქოვანმა, – ამასთან, სპეციალისტების პროგნოზის გათვალისწინებით, 2-3 კვირის შემდეგ, პიკის გადალახვის შემთხვევაში, აქტიურად შევძლებთ დავიწყოთ შეზღუდვების მოხსნის გეგმის განხორიცელება, ეკონომიკური აქტივობებისთვის და ეკონომიკური ცხოვრებისთვის ხელშეწყობა.“

საქართველოში მსუბუქი ავტომანქანებით გადაადგილება 17 აპრილიs დღის 12:00 საათიდან 21 აპრილის ჩათვლით იყო აკრძალული. მთავრობამ ეს გადაწყვეტილება ქვეყანაში კორონავირუსის შიდა გავრცელების ზრდით ახსნა.

ავტომანქანებით გადაადგილების აკრძალვა არ ეხება ტვირთების გადაზიდვას, დისტრიბუციას და „მიტანის სერვისს.“