ხარაგაულის სასწრაფო-სამედიცინო სამსახურის მედდა ინგა ზუმბაძე სოციალური ქსელით ხარაგაულელებს მიმართავს:

– ჩემო მეგობრებო, ამ დრომდე, მეტნაკლებად, დაცულები ვიყავით ხარაგაულში ამ საშინელი დაავადებისგან. თუმცა, რადგან სხვადასხვა ქალაქებიდან და მუნიციპალიტეტებიდან ხარაგაულში ბევრი ადამიანი ჩამოვიდა, უსაფრთხოდ აღარ ვართ.

ჩემსავით ჯიუტი, თავნება და კანონს დაუმორჩილებელი ადამიანი დედამიწაზე არ მეგულება და დღეს მეც კი ძალიან მაღელვებს, მაფიქრებს მოსალოდნელი საფრთხე.

კორონავირუსი არ არის სახუმარო დაავადება, რომელსაც ვუმკურნალებთ და მოვრჩებით.

რა, ხალხნო, იმაზე მეტია, ვიდრე წარმოგვიდგენია!

მოგმართავთ ყველას, მოუფრთხილდეთ ერთმანეთის სიცოცხლეს, ერთმანეთის ოჯახის წევრებს, მომავალს და შედით მედპერსონალის მდგომარეობაშიც.

საშინელებაა ჯერ იმ ფორმაში ყოფნა და ყველაზე საშინელება იმ წუთის ლოდინი, – შენგან გადაყვანილ პაციენტს როგორი პასუხი მოუვა.

ბევრს აღარ გავაგრძელებ, სახლიდან მოგილოცავთ აღდგომის უდიდეს დღესასწაულს. ჯანმრთელობასა და სულის სიმტკიცეს გისურვებთ. გვფარავდეს უფალი. ყველა მიყვარხართ და მინდა, ხარაგაულში კორონავირუსზე დადებითი არცერთი შემთხვევა არ იყოს.

დავრჩეთ სახლში და თუ ვერ ვრჩებით, ნიღბით ვიაროთ და დისტანცია დავიცვათ.

ერთს გთხოვთ, სასწრაფო სამედიცინო სამსახურის ბრიგადას, გამოძახების შემთხვევაში, ნუ დაგვიმალავთ ნურც ტემპერატურის ქონას და ნურც მოგზაურობის ისტორიას.

ჩვენც გვყავს ოჯახები, შვილები, მშობლები და თქვენნაირი უიმუნიტეტო ადამიანები ვართ.