ხარაგაულის მუნიციპალიტეტში სოფლად მცხოვრები მოსახლეობა მიწას ხარებით, ან მინიტრაქტორებით ამუშავებს.

შპს „მექანიზატორი“ წელს ხარაგაულელებს, ტექნიკის სიმცირის გამო, ვეღარ ემსახურება.

შპს „მექანიზატორის“ მენეჯერის, გია დევდარიანის ინფორმაციით, მათ 12 ტრაქტორი ჰყავთ და ზესტაფონის, ხარაგაულის, თერჯოლის, ჭიათურისა და ბაღდათის მუნიციპალიტეტებს ემსახურებიან.

„ტრაქტორების უმრავლესობა აუქციონზე გაიყიდა, – ამბობს გია დევდარიანი, – ამიტომ მიწის დახვნის ყველა მსურველს ვერ ვემსახურებით. შესაძლოა, ხარაგაულში, აღდგომის შემდეგ შევძლოთ მოსვლა. გასულ კვირაში კიცხიდან დაგვიკავშირდნენ და იქ ვიმუშავეთ“.

შპს „მექანიზატორის“ ტრაქტორით ერთი ჰა მიწის დახვნა 100 ლარი ღირს. ამას ემატება ტრაქტორის ტრანსპორტირებისა და საწვავის ხარჯი. მიწის დამუშავების მსურველები შეგიძლიათ დაუკავშირდეთ გია დევდარიანს ტელეფონით შემდეგ ნომერზე: 551 21 24 24.

სოფლის მეურნეობის სამინისტროს საინფორმაციო-საკონსულტაციო სამსახურის უფროსის, ბონდო კიკნაველიძის ინფორმაციით, ამ დროისთვის ხარაგაულის მუნიციპალიტეტში 300 ჰა მიწაა დამუშავებული. სულ ხარაგაულში სახნავ-სათესი ფართობი 3 856 ჰექტარია.

გასულ წელს ხარაგაულის მუნიციპალიტეტში 2 300 ჰა მიწა დამუშავდა.