ახალი კორონავირუსის პანდემიის გამო ხარაგაულის მუნიციპალიტეტში თვითიზოლაციასა და კარანტინში, ამ ეტაპზე, არც ერთი მოქალაქე აღარ იმყოფება.

ეს ინფორმაცია ხარაგაულის საზოგადოებრივი ჯანდაცვის ცენტრის დირექტორის, შმაგი ხიჯაკაძისგან მოვიპოვეთ. თვითიზოლაციის ვადა გაუვიდათ ხარაგაულში რიკოთის ავტობანის მშენებლობაზე მარნეულიდან ჩამოსულ პირებს; ასევე იმ ოჯახის წევრებს, სადაც თერჯოლელი მამაკაცი იმყოფებოდა. ამ მამაკაცის შვილს კორონავირუსი დაუდასტურდა.

შმაგი ხიჯაკაძის ინფორმაციით, რამდენიმე დღის წინ თერჯოლაში, ცხელების ცენტრში, ხარაგაულიდან ოთხი მოქალაქე გადაიყვანეს. კორონავირუსი არც ერთ მათგანს არ დაუდასტურდა. ოჯახის ექიმის მეთვალყურეობის ქვეშაა სამი მოქალაქე, რომელთაც დაბალი ტემპერატურა აღენიშნებათ და სავარაუდოდ, სეზონური გრიპი აქვთ.

კორონავირუსით დაავადებულთა მატების შემთხვევაში ნიმუშების აღებაში საზოგადოებრივი ჯანდაცვის ცენტრი ჩაერთვება. ამ მიზნით ცენტრის ერთი თანამშრომელი გადამზადდა.

ხარაგაულის საზოგადოებრივი ჯანდაცვის ცენტრი მოქალაქეებს მოუწოდებს, რომ დარჩნენ სახლში.

„სახლში ყოფნა – ეს არის ყველაზე დიდი პრევენცია, – ამბობს შმაგი ხიჯაკაძე, – ახლა ქალაქებიდან სოფლებში ბევრი ჩვენი თანასოფლელი, ნათესავი, მეგობარი ჩამოვიდა. მოგიწოდებთ ყველას, თავი შეიკავეთ ერთმანეთთან სტუმრობისგან. გაუფრთხილდით საკუთარ და სხვების ჯანმრთელობას“.