მომავალ ლიდერთა გაცვლითი პროგრამის (FLEX) გამარჯვებული, ხარაგაულის მუნიციპალიტეტის სოფელ ბორის საჯარო სკოლის მეთორმეტე კლასის მოსწავლე სალომე მაჭავარიანი ამერიკიდან დაბრუნდა.

სალომე ერთი სასწავლო წლის განმავლობაში აიოვას შტატის ქალაქ ვატერლოოში სწავლობდა და ამერიკულ ოჯახში ცხოვრობდა.

ახალი კორონავირუსის პანდემიის გამო FLEX-ის 79 მონაწილე საქართველოში სპეციალური რეისით ჩამოფრინდა.

„მსოფლიოში არსებული ვითარება ფლექს პროგრამაზეც აისახა, – ამბობს სალომე მაჭავარიანი, – საქართველოში ნაადრევად დავბრუნდით. მე 18 მაისს უნდა ჩამოვსულიყავი, ფლექსის ზოგიერთი მონაწილე – 12 ივნისს. ჩარტერული რეისით ვაშინგტონიდან ყატარში ჩავფრინდით, ყატარიდან კი – თბილისში. ორ საკარანტინო ზონაში გადაგვანაწილეს – წინანდალსა და თბილისში. მე თბილისში სასტუმრო „შერატონში“ ვიმყოფები. თავს კარგად ვგრძნობ. სასტუმროში ძალიან კარგი პირობებია.

ბოლო ერთი თვე ამერიკაში სკოლები დაკეტილი იყო. მასპინძელ ოჯახთან განშორება ძალიან გამიჭირდა. ახლა, საქართველოში ჩამოსულს, ძალიან მენატრება ჩემი მშობლიური სახლი, მშობლები, ოჯახის წევრები, მეგობრები, მაგრამ ეს ორი კვირაც მალე გაივლის“.

FLEX-ის პროგრამის მონაწილეთა დაბრუნება შესაძლებელი გახდა საქართველოსა და აშშ-ის მთავრობათა თანამშრომლობის შედეგად. მოსწავლეების ყატარის დედაქალაქ დოჰაში ჩაყვანა ამერიკულმა მხარემ, ხოლო დოჰადან სპეცრეისით თბილისამდე, საქართველოს მთავრობამ უზრუნველყო. ქართველ მოსწავლეებთან ერთად თბილისში ჩამოვიდა 35 მოსწავლე სომხეთიდან, რომლებიც ქართველ თანატოლებთან ერთად ამერიკაში იმყოფებოდნენ.

ფოტოზე: სალომე მაჭავარიანი (მეორე რიგში მარჯვნიდან მეორე) FLEX-ის მონაწილეთა ერთ ჯგუფთან ერთად.