ინფექციური პათოლოგიის, შიდსის და კლინიკური იმუნოლოგიის ცენტრის გენერალური დირექტორი თენგიზ ცერცვაძე მოგვიწოდებს, რომ საგანგებო მდგომარეობის ყველა რეკომენდაცია ძალიან მკაცრად შევასრულოთ.

„რაც შეიძლება ჩქარა უნდა უზრუნველვყოთ ეპიდემიის გავრცელების მდგრადობა, – ამბობს თენგიზ ცერცვაძე, – თუ ჩვენ ეს არ უზრუნველვყავით, დაბალ გავრცელებას, სიკვდილიანობის დაბალ მაჩვენებელს შევინარჩუნებთ, მაგრამ ეკონომიკა შეიძლება ჩამოიშალოს. ამას შეიძლება გაუძლოს, ვთქვათ, გერმანიის ეკონომიკამ – ბუნდესტაგმა მერკელს 150 მლრ ევრო გამოუყო, რომ აანაზღაუროს დანაკლისი, მაგრამ საქართველოს ხომ ამის შესაძლებლობა არ აქვს.

ჩვენ სხვა ქვეყნებზე მეტად შევძელით ეპიდემია შეგვეკავებინა. საქართველოში გვაქვს კორონავირუსის ეპიდემიის ყველაზე მცირე გავრცელება და დაბალი სიკვდილიანობა. მაქსიმუმ ერთ-ორ თვეში ეს სისტემა მდგრადი უნდა გავხადოთ, რომ ეკონომიკა ამუშავდეს – მაღაზიები, რესტორნები, სასტუმროები გაიხსნას, ტურისტების შემოსვლა დაიწყოს. ამ კუთხითაც უნდა დავფიქრდეთ, რომ ეს კარანტინი უზრუნველყოფს არა მხოლოდ ჩვენი და ჩვენი ახლობლების, არამედ ქვეყნის უსაფრთხოებას. წინააღმდეგ შემთხვევაში, არავითარი მნიშვნელობა არ აქვს, ვირუსისგან დავზარალდებით, თუ ელემენტარული სახსრების უქონლობისგან.

ჩემი პროგნოზით, ორ-სამ კვირაში ინფიცირებულთა რაოდენობა 300-400-მდე გაიზრდება. ჩვენ ყველაფერი უნდა გავაკეთოთ, რომ ეს პიკი იყოს მდორე. ეს შესაძლებელია მხოლოდ მკაცრი კარანტინით. რომ არ შემოღებულიყო საგანგებო მდგომარეობა და არ განხორციელებულიყო მყისიერი ღონისძიებები მარნეულსა და ბოლნისში, მარტო იქედან იქნებოდა დღეს რამდენიმე ასეული შემთხვევა. ეს მდგომარეობა განპირობებულია მაღალი სამოქალაქო პასუხისმგებლობითა და მთავრობისგან დროულად მიღებული ზომებით. თუმცა, მიღწეულით არ უნდა გავთამამდეთ“.