ეს ინფორმაცია განათლების მინისტრმა მიხეილ ჩხენკელმა კორონავირუსთან დაკავშირებით მოქმედი უწყებათაშორისი საკოორდინაციო საბჭოს სხდომის შემდეგ გაავრცელა.

„ეს სემესტრი აუცილებლად შედგება და არც ერთ შემთხვევაში არ შეჩერდება, – აღნიშნა მიხეილ ჩხენკელმა, – სკოლები დისტანციური სწავლების სხვადასხვა პროგრამებს იყენებენ. მნიშვნელოვანია პროექტი „ტელესკოლა“, რომელიც ყველასთვის ხელმისაწვდომია.

ეკონომიკური განვითარებისა და თანამშრომლობის საერთაშორისო ორგანიზაციამ გამოაქვეყნა ჩარჩო დოკუმენტი, სადაც კორონავირუსის გამო შექმნილი გამოწვევების დასაძლევად განათლების მიმართულებით საქართველო შეფასებულია როგორც ერთ-ერთი საუკეთესო ქვეყანა მსოფლიოში.“

მიხეილ ჩხენკელმა მადლობა გადაუხადა დისტანციურ სწავლებაში ჩართულ მასწავლებლებს.

განათლების მინისტრის ინფორმაციით, ერთიანი ეროვნული გამოცდების ჩატარების თარიღის ცვლილება არ განიხილება. ეროვნულ გამოცდებზე რეგისტრაციის ვადა კი 30 აპრილამდე გაგრძელდა.