კორონავირუსის გავრცელების საფრთხის გამო, ხარაგაულის თვითმმართველობა მუნიციპალიტეტში მცხოვრებ 70 წელს ზემოთ ასაკის მარტოხელა მოქალაქეებისთვის პროდუქტების სახლებში მიტანას უზრუნველყოფს.

ამ მიზნით ადგილობრივი ბიუჯეტიდან 12 000 ლარი ააიპ „სათნოების სახლს“ გამოეყო.

ხარაგაულის მერიიდან მოპოვებული ინფორმაციით, საკვებ პროდუქტებს 206 მარტოხელა მოქალაქე მიიღებს. სიები „სათნოების სახლს“ ადმინისტრაციულ ერთეულებში მერის წარმომადგენლებმა მიაწოდეს. თითოეული ბენეფიციარი 10-10 კილოგრამ პურის ფქვილს, ერთ ლიტრ ზეთს, თითო-თითო კილოგრამ მაკარონს, ბრინჯს, შაქარს, წიწიბურასა და კანფეტს მიიღებს. პროდუქტების დარიგება 2 აპრილიდან დაიწყო.