ხარაგაულის სკოლამდელ დაწესებულებათა გაერთიანების დირექტორის, მამუკა ჭიპაშვილისგან, მიღებული ინფორმაციით, გაერთიანებაში შემავალი 19 საბავშვო ბაღისა და ორი სასკოლო მზაობის ჯგუფის 600 აღსაზრდელზე საკვების ის ოდენობა გაიცემა, რაც ერთი თვის განმავლობაში – 1 მარტიდან 1 აპრილამდე – ბავშვებს სკოლამდელ დაწესებულებებში უნდა მიეღოთ.

„საკვები პროდუქტების მომწოდებლებს მოთხოვნა მივაწოდეთ და ველოდებით, როდის შემოიტანენ, – ამბობს მამუკა ჭიპაშვილი, – ამ პროდუქტებს ყველა საბავშვო ბაღში დაფასოებული სახით მივიტანთ, რის შემდეგაც საბავშვო ბაღების გამგეები მშობლებს ინფორმაციას მიაწვდიან. კვების პროდუქტები მშობლებმა საბავშვო ბაღებიდან თავად უნდა წაიღონ. პროდუქტების გაცემა, სავარაუდოდ, მომავალი კვირიდან დაიწყება“.

ფოტოზე: ვარძიის საბავშვო ბაღი.