რიკოთის ავტობანის მშენებლობაზე 27 მარნეულელი მოქალაქეა დასაქმებული. ისინი ხარაგაულის მუნიციპალიტეტის ტერიტორიაზე მარნეულის საკარანტინო ზონად გამოცხადების დღეებში დაბრუნდნენ.

ხარაგაულის საზოგადოებრივი ჯანდაცვის ცენტრის დირექტორ შმაგი ხიჯაკაძისგან მოპოვებული ინფორმაციით, მარნეულიდან ჩამოსული 27 მოქალაქე თვითიზოლაციაში ავტობანის მშენებელი კომპანიისგან დაქირავებულ სახლებში, სოფელ უბისაში, იმყოფებიან.

შმაგი ხიჯაკაძე ამბობს, რომ ყველა მათგანი ექიმის მეთვალყურეობის ქვეშაა და ისინი თავს ჯანმრთელად გრძნობენ.

ამ ეტაპზე ხარაგაულის მუნიციპალიტეტში თვითიზოლაციაში სულ 39 პირი რჩება, ერთი მათგანი კარანტინშია. აქედან 27 პირი არის მარნეულიდან, ხოლო დანარჩენებს საზღვარგარეთ მოგზაურობის ისტორია აქვთ.