რას გეგმავს ხელისუფლება რეგიონებში კორონავირუსის პანდემიის პირობებში – ამ შეკითხვით საქართველოს მთავრობის ადმინისტრაციის რეგიონული განვითარების სამსახურის უფროსს სოზარ სუბარს მივმართეთ.

„ჩემი ხარაგაულის“ რედაქციასთან საუბარში სოზარ სუბარმა აღნიშნა, რომ საქართველომ დროულად დაიწყო ზრუნვა კორონავირუსის წინააღმდეგ.

-შედეგად მივიღეთ ის, რომ კორონავირუსის პირველად დადასტურებიდან დღემდე შედარებით ნაკლები ადამიანი დაინფიცირდა, ვიდრე სხვა ქვეყნებში, – ამბობს სოზარ სუბარი, – ძალიან მნიშვნელოვანია თავად მოსახლეობის მზადყოფნა. ბევრი მოქალაქე ფსიქოლოგიურად მზად შეხვდა პანდემიას – ითვალისწინებენ სახელმწიფოსგან და და ექიმებისგან გაცემულ რეკომენდაციებს. თუმცა, არინ გამონაკლისები, რომლებსაც არც საკუთარი და არც სხვების ჯანმრთელობა აინტერესებთ. ამის გამოა, რომ დაინფიცირებულთა რიცხვი 40-ს გასცდა.

როცა გლობალური კატასტროფები ხდება, ეს ერთი რომელიმე მოთამაშის ზურგზე ვერ გადაივლის. ამიტომაც ეს სიმძიმე მთავრობამ, ბიზნესმა და მოქალაქეებმა თანაბრად უნდა გადავინაწილოთ. ყველაფერს ვაკეთებთ, რომ სოციალურად დაუცველ მოქალაქეებს პრობლემები არ შეექმნათ. დღეიდან თბილისის მსგავსად უკვე რეგიონებში საბავშვო ბაღის აღსაზრდელები საჭმელს სახლებში მიიღებენ.

ყველა რეგიონში არიან მოხალისეები, რომლებიც სხვადასხვა საქმიანობებში ჩაერთვნენ. ჩვენ ვზრუნავთ ამ მოხალისეების ჯანმრთელობასა უსაფრთხოებაზე. მათ ვატრენინგებთ და უსაფრთხოებისთვის საჭირო ინვენტარით ვამარაგებთ.

ეს შოკი რომ გადაივლის და ვირუსი დამარცხდება, ეკონომიკამ ადვილად უნდა შეძლოს ფეხზე წამოდგომა. ამისთვის მუშავდება მთელი რიგი პროგრამები.

ერთი, რაც დაგვანახა ამ პანდემიამ ის არის, რომ საკუთარი წარმოება უნდა გვქონდეს. საყოველთაო პანდემიის დროს ყველა ქვეყანა საკუთარ თავზე ზრუნავს. ძალიან მნიშვნელოვანია, რომ საქართველოში არ შეიქმნა დეფიციტი არც ერთ სასიცოცხლოდ მნიშვნელოვან პროდუქტზე.

უკვე საგაზაფხულო სამუშაოები იწყება და ვიზრუნებთ იმისთვის, რომ ყველაფერმა ნაყოფიერად ჩაიაროს. სოფლის მეურნეობის სამინისტრო მალე ახალი ინიციატივებით გამოვა, თუ როგორ დავეხმარებით სოფლად მცხოვრებ მოსახლეობას მეურნეობის განვითარებაში.

ნინო კაპანაძე