როგორ შევინარჩუნოთ ფსიქიკური ჯანმრთელობა და სიმშვიდე პანდემიის დროს?

ფსიქოლოგი ნოდარ სარჯველაძე „ჩემი ხარაგაულის“ რედაქციასთან საუბარში ამბობს, რომ კაცობრიობა უზარმაზარი გამოწვევის წინაშე დგას.

-ადამიანები ერთმანეთს უნდა განვერიდოთ და ამავე დროს უნდა გავერთიანდეთ. ცხოვრება გაჭირვების გარეშე არ არსებობს. თუმცა, კორონავირუსი კაცობრიობის გაჭირვებაა. აქ უკვე თითოეული ჩვენთაგანის პასუხისმგებლობა იზრდება. მხოლოდ ერთობლივი და შეთანხმებული მოქმედებით, მარტივი ჰიგიენური წესების დაცვით თუ დავამარცხებთ კორონავირუსს.

ჩვენი ჯანმრთელობა ახლა ჰიგიენასა და სიმშვიდეზეა დამოკიდებული. ორი ამოცანა დაგვიყენა კორონავირუსმა – ჰიგიენა და თვითიზოლაცია. რთულ სიტუაციაში ვართ, რადგან უხილავ წყაროს უნდა განვერიდოთ. საიდან დავინფიცირდებით, არ ვიცით. ეს კი შფოთვას იწვევს. შფოთვა ჯანმრთელობას შეარყევს. როცა ადამიანი შფოთავს, ნერვული უჯრედები მიყურადებულები არიან, თავადაც შფოთავენ და სუსტდებიან. ამიტომ ფრთხილად უნდა ვიყოთ – ვირუსი გაივლის, მაგრამ კვალს დატოვებს.

მომავალს იმედიანად უნდა შევხედოთ. ახლა ყველა ჩვენთაგანის ამოცანაა, რომ გადავრჩეთ. დავრჩეთ სახლში და ვიკითხოთ წიგნები, ქალბატონებმა ქსოვეთ. ერთმანეთის ხიდი უნდა გავხდეთ. ერთმანეთს უნდა დავეხმაროთ და არა მარტო საკუთარ, არამედ სხვების სიმშვიდეზეც უნდა ვიზრუნოთ.

ნინო კაპანაძე