კორონავირუსის გავრცელების პრევენციისთვის საქართველოში ბიზნესექტორის დიდი ნაწილი დისტანციურ მუშაობაზე გადავიდა.

მთავრობის გადაწყვეტილებით, უნდა დაიხუროს ყველა სავაჭრო ობიექტი, გარდა სასურსათო მაღაზიების, აფთიაქების, ბენზინგასამართი სადგურების, ბანკებისა და საფოსტო განყოფილებებისა.

-როგორ აისახება კორონავირუსი საქართველოს ეკონომიკაზე, ეს მას შემდეგ გამოჩნდება, როცა ოფიციალური მონაცემები გვექნება, – ამბობს „ჩემი ხარაგაულის“ რედაქციასთან საუბარში PMC-IS კვლევითი ცენტრის ეკონომისტი, ექსპერტი მიხეილ კუკავა, – თუმცა, ცხადია, რომ უარყოფითად. პრაქტიკულად ყველა ბიზნესი გადასულია დისტანციურ მუშაობაზე, მაგრამ ზოგს ეს არ შეუძლია მისი სპეციფიკიდან გამომდინარე.

რას უნდა ველოდეთ, ეს დამოკიდებულია ეპიდემიოლოგიურ სიტუაციაზე. თუ მდგომარეობა გაუარესდა, უარესისთვის უნდა მოვემზადოთ.

ეროვნულმა ბანკმა განაცხადა, რომ საქართველოსთვის ფინანსურ რესურსებზე წვდომის გაზრდასთან დაკავშირებით საერთაშორისო სავალუტო ფონდსა და სხვა დონორებს მიმართავს. ამას ასევე დაემატება სხვა საერთაშორისო დონორების მიერ კორონავირუსის პანდემიის შედეგების შესარბილებლად გამოყოფილი სახსრები, რისი დეტალებიც ჯერ არ ვიცით.

ეს ყველაფერი ხელს შეუწყობს საგარეო დისბალანსის აღმოფხვრას და ინფლაციის საშუალოვადიან დინამიკაზე დადებითად აისახება. ეს, ცხადია, დაპაუზებულ ცხოვრებას ვერ შეცვლის, თუმცა მდგომარეობას შეამსუბუქებს.

ნინო კაპანაძე