მსოფლიოში კორონავირუსის გავრცელების არეალი თანდათან იზრდება. ერთ-ერთი ყველა მაღალი რისკის მქონე ქვეყანად იტალია სახელდება. „ჩემი ხარაგაულის“ რედაქცია იტალიაში, ფლორენციის წმინდა ნინოს სამრევლოს მოძღვარ არქიმანდრიტ მამა ანდრიას (ლაცაბიძე) დაუკავშირდა. მოძღვარმა სიმშვიდისკენ მოგვიწოდა:

-მთელ იტალიაში კარანტინია გამოცხადებული. 60 მილიონი ადამიანი კარანტინშია. სახლიდან გამოსვლა შეზღუდულია. ოჯახიდან ერთი ადამიანი უნდა გავიდეს – ისიც საჭმელზე ან წამალზე. თუ სამსახურში მიდის, სპეციალური მოდულია შესავსები – სად და რატომ მიდიხარ. ამ განაცხადს პოლიცია ამოწმებს. იტალიის მთავრობის ახალი დეკრეტის საფუძველზე, შეწყვეტილია ეკლესიებში საზოგადო მსახურება – დაკრძალვის ცერემონია, სახლის კურთხვა და სხვ. იტალიაში ორ ქართველს დაუდგინდა ეს ვირუსი და გადაყვანილები არიან საავადმყოფოებში.

ჩემო ძვირფასო თანამემამულენო, სამრევლოს წევრებო, გთხოვთ და მოგიწოდებთ ყველას, განსაკუთრებული პასუხისმგებლობით მოვეკიდოთ შექმნილ მდგომარეობას, რადგანაც იტალიაში სიტუაცია რთულდება და დაინფიცირებულ და გარდაცვლილ ადამიანთა რიცხვი იზრდება.

თითოეულ ჩვენთაგანზე დიდია სამოქალაქო პასუხისმგებლობა. ქრისტიანი ადამიანი ვალდებულია, დაემორჩილოს როგორც საეკლესიო, ასევე საერო კანონებს. ამიტომ მაქსიმალურად შევეცადოთ, სახლებში ვიყოთ და სიტუაციის გაუმჯობესებას დაველოდოთ.
ნუ ავყვებით შიშსა და პანიკას. გავერთიანდეთ, დისტანციურად ვეკონტაქტოთ ერთმანეთს და მეტად მივენდოთ უფალს. გავძლიერდეთ ლოცვებში. ღვთის წყალობით ყველაფერი მშვიდობით დასრულდება.
უფალმა დალოცოს ჩვენი ქვეყანა და იტალია, ქალაქები, სადაც ჩვენი თანამემამულენი შრომობენ.
სნეულებაში მყოფ ყველა ადამიანს მალე გამოჯანმრთელებას ვუსურვებ.
მადლი სულისა წმინდისა უძლურთა მკურნალი და ნაკლულევანთა აღმავსებელი იფარავდეს ჩვენს ცხოვრებას. ამინ!

ამ მომენტისთვის საქართველოში კორონავირუსის დადასტურებული 23 შემთხვევაა. კარანტინის რეჟიმშია 298 მოქალაქე, სტაციონარში მეთვალყურეობის ქვეშ – 46.