„ჩემი ხარაგაულისგან“ გადამოწმებული ინფორმაციით, ხარაგაულის ერთ-ერთ სოფელში ორი კვირის წინ იტალიიდან ახალგაზრდა მამაკაცი დაბრუნდა.

ის იტალიაში დედასთან იმყოფებოდა. ამ სოფლის მკვიდრთა ინფორმაციით, მამაკაცს აღენიშნებოდა ხველა და ის, სავარაუდოდ, ხარაგაულის საავადმყოფოშიც იმყოფებოდა. გადაადგილდებოდა საზოგადოებრივი ტრანსპორტით.

ხარაგაულის საავადმყოფოს დირექტორის, გიორგი ამურველაშვილის ინფორმაციით, ახალგაზრდა მამაკაცი კლინიკაში მივიდა და თავისი უბნის ექიმი მოიკითხა, რომელიც იმ დროს საავადმყოფოში არ იმყოფებოდა. მას დახმარება საავადმყოფოს პერსონალისგან არ უთხოვია.

მოსახლეობა ამ ფაქტით შეშფოთებულია და მომხდარის შესახებ ხარაგაულის საზოგადოებრივი ჯანდაცვის ცენტრის დირექტორ შმაგი ხიჯაკაძეს აცნობეს.

შმაგი ხიჯაკაძის ინფორმაციით, „იტალიიდან დაბრუნებული მამაკაცის საკარანტინო ვადა – 14 დღე – უკვე გასულია. მას ახლა ხველა აღენიშნება. თუ მდგომარეობა გართულდა, სასწრაფო დახმარებას გამოიძახებს და როგორც ექიმები გადაწყვეტენ, ისე უნდა მოიქცეს.“

ამჟამად იტალიიდან ხარაგაულში დაბრუნებული კიდევ ერთი ქალი თვითიზოლაციაში არ იმყოფება.