ხელისუფლების და ოპოზიციის წარმომადგენლებმა ხელი მოაწერეს შეთანხმებას, რომლის მიხედვითაც, 2020 წლის საპარლამენტო არჩევნები მანდატების 120/30 გადანაწილებით ჩატარდება. პარლამენტი შედგება პროპორციული წესით არჩეული 120 და მაჟორიტარული წესით არჩეული 30 დეპუტატისგან. პროპორციულ ნაწილში ბარიერი 1% იქნება.

აღნიშნული შეთანხმებას პარლამენტი განიხილავს და კანონპროექტის მხარდაჭერის შემთხვევაში შესაბამისი ცვლილება კონსტიტუციაში შევა.

ბაღდათი-ხარაგაულის მაჟორიტარი დეპუტატი კობა ლურსმანაშვილი ამბობს, რომ ახალ საარჩევნო სისტემას მხარს დაუჭერს.

„სრულად პროპორციული სისტემა ქვეყანაში სტაბილურობას საფრთხეს უქმნიდა. გამარჯვებულ პარტიას ხმების 49% რომ მიეღო, შესაძლებელია მთავრობა ვერ დაეკომპლექტებია, რაც არასამართლიანი იყო, – ამბობს კობა ლურსმანაშვილი, – ამ საარჩევნო სისტემით ეს გამორიცხულია, ვინაიდან 40%-იანი ჩამკეტია შემოტანილი, რაც ნიშნავს იმას, რომ პარტია, რომელიც ამომრჩეველთა 40%-ზე ნაკლებ ხმას მიიღებს, ის ვერ დააკომპლექტებს მთავრობას და უმრავლესობა ვერ ექნება პარლამენტში. გარდა ამისა, ცვლილების მიხედვით, ახალი კანონმდებლობით შემოდის 1%-იანი ბარიერი, რაც საარჩევნო ველზე და პარლამენტში ყველა იმ პარტიის წარმოჩენას უზრუნველყოფს, ვისაც ამომჩევლის მხარდაჭერა ექნება. საარჩევნო სისტემები და ოლქები არ უზრუნველყოფს პარლამენტში პოლიტიკური ძალების წარმოდგენას ამას ამომრჩეველი უზრუნველყოფს.

ჩვენ, მაჟორიტარები რასაც ვითხოვდით ეს კომპონენტი კანონპროექტში სრულადაა ასახული. შესაძლებელია ოლქები შემცირდა, მაგრამ მაინც დარჩა მაჟორიტარული კომპონენტი ანუ რეგიონებში მცხოვრებ მოსახლეობას პარლამენტში წარნმომადგენელი ეყოლება. თუ გავითვალისწინებთ ხმათა თანაბრობის დაცვის ვალდებულებას, გამოდის რომ დაახლოებით 120  ათასი ამომრჩეველი შექმნის ერთ საარჩევნო ოლქს, ასეთ შემთხვევაში ხშირი იქნება 3,4,5 მუნიციპალიტეტის გაერთიანება ერთ საარჩევნო ოლქად“.