სოფელ წიფის მოსახლეობა წიფის გვირაბის შესასვლელთან გაჩერებაზე 50 მეტრი სიგრძის ბაქანის მოწყობას, ცხრა წელია, ითხოვს.

2011 წელს ხარაგაულში მომხდარი სტიქიის შედეგად მოდიდებულმა წყალმა ამ გაჩერებაზე მანამდე არსებული ბაქანი წაიღო. მას შემდეგ მოსახლეობას მატარებელში ასვლა-ჩამოსვლა ძალიან უჭირს. აქ ელექტროსამგზავრო მატარებლები აჩერებენ. აღნიშნული გაჩერებით სოფელ წიფის მოსახლეობის დიდი ნაწილი სარგებლობს. ისინი რკინიგზის სადგურ წიფადან 3-4 კილომეტრის დაშორებით ცხოვრობენ. მოსახლეობის განცხადებით, ამ პრობლემის გადაუჭრელობა უბედური შემთხვევის რისკს ზრდის.

სოფელ წიფის მოსახლეობამ ამ წლების განმავლობაში წერილობით სს „საქართველოს რკინიგზას“, პრემიერ-მინისტრს, პარლამენტში მაჟორიტარ დეპუტატს, ხარაგაულის მუნიციპალიტეტის ადგილობრივ ხელისუფლებას რამდენჯერმე მიმართა. მოსახლეობის ინფორმაციით, ადგილზე იმყოფებოდნენ სს „საქართველოს რკინიგზის“ წარმომადგენლები, თუმცა სასიკეთოდ არაფერი შეცვლილა.

2014 წლის თებერვალში ხარაგაულის მუნიციპალიტეტის მაშინდელ მაჟორიტარ დეპუტატ ნოდარ ებანოიძეს „საქართველოს რკინიგზადან“ უპასუხეს, რომ 2013-2014 წლებში წიფაში ბაქანის მშენებლობისთვის გამოცხადებული ტენდერები არ შედგა და ამ პრობლემის მოგვარება 2015 წლის ბიზნეს გეგმაში გაითვალისწინეს.

2017 წელს „საქართველოს რკინიგზას“, ამ საკითხთან დაკავშირებით, ხარაგაულის მუნიციპალიტეტის საკრებულოს თავმჯდომარე მანანა ბარბაქაძემ მიმართა. მისთვის გამოგზავნილ საპასუხო წერილში აღნიშნულია, რომ 2017 წლის ბიზნეს გეგმით წიფაში ბაქანის მოწყობა არ იგეგმებოდა, თუმცა, მზად იყვნენ ყველა იმ საქმიანი წინადადების მისაღებად, რომელიც მგზავრთა პირობებს გააუმჯობესებდა.

როდის მოეწყობა ბაქანი წიფის გვირაბის შესასვლელთან, – „ჩემი ხარაგაულის“ რედაქციამ ამ შეკითხვით ს/ს „საქართველოს რკინიგზას“ მიმართა.

„როგორც თქვენთვის ცნობილია, საქართველოს რკინიგზა ახორციელებს თბილისი-მახინჯაურის მთავარი სარკინიგზო მაგისტრალის მოდერნიზაციის პროექტს. პროექტის დასრულების შემდეგ მოხდება ახალაშენებული სარკინიგზო ინფრასტრუქტურის დაერთება სადგურ მოლითთან.

აღნიშნულიდან გამომდინარე, წიფაში ბაქანის რეაბილიტაცია, სს „საქართველოს რკინიგზის“ 2020 წლის ბიზნეს-გეგმით არ არის გათვალისწინებული.

სს „საქართველოს რკინიგზა“ განსაკუთრებულ ყურადღებას უთმობს, მგზავრთა სოციალურ მოთხოვნებს და აცხადებს მზადყოფნას, მომავალში განიხილოს და შეძლებისდაგვარად გაითვალისწინოს ყველა საქმიანი წინადადება, რომელიც ხელს შეუწყობს მგზავრთა პირობების გაუმჯობესებას“, – აღნიშნულია ს/ს „საქართველოს რკინიგზადან“ მიღებულ პასუხში.