სატელევიზიო კომპანიამ „მთავარი არხი“ გაავრცელა ინფორმაცია იმის შესახებ, რომ თბილისის იაშვილის კლინიკაში ხარაგაულელი მოზარდი კორონა ვირუსის სიმპტომებით მოათავსეს.

ინფორმაციის გადასამოწმებლად დავუკავშირდით დაავადებათა კონტროლის ეროვნულ ცენტრს, საიდანაც გვიპასუხეს, რომ ამჟამად ლუგარის ლაბორატორიიდან 24 პაციენტის ანალიზების პასუხებს ელოდებიან. პაციენტთა შესახებ ინფორმაცია კონფიდენციალურია.

მთავარი არხის საინფორმაციო სამსახურის უფროსმა ნოდარ მელაძემ კი გვიპასუხა, რომ მათ ეს ინფორმაცია ინფექციური საავადმყოფოს სამედიცინო დირექტორ მარინა ეზუგბაიასგან მიიღეს.

ნამდვილად არის თუ არა იაშვილის კლინიკაში მოთავსებული მოზარდი ხარაგაულიდან, – ეს, ჯერჯერობით, უცნობია ხარაგაულის საზოგადოებრივი ჯანდაცვის ცენტრის ხელმძღვანელ შმაგი ხიჯაკაძისთვის.

„რამდენიმე საათია ვარკვევ, – ამბობს შმაგი ხიჯაკაძე, – ხარაგაულში ყველა ექიმს, სასწრაფო დახმარების სამსახურს, სკოლის დირექტორებს, სოფლის რწმუნებულებს დავუკავშირდი. ვერავინ მიდასტურებს, რომ იაშვილის კლინიკაში მოთავსებული მოზარდი ხარაგაულელია. ხვალ დილით დაზუსტებით მეცოდინება. რაც შეეხება ბორითში, საკარანტინო პირობებში მყოფ ცხრა ჩინელ მოქალაქეს, მათი ჯანმრთელობის მდგომარეობა ნორმალურია“.

ლაურა გოგოლაძე