შესაბამისი ცვლილება „ნარჩენების მართვის კოდექსში“ შედის.

ცვლილებების თანახმად, 2 კგ-მდე მუნიციპალური ნარჩენით გარემოს დანაგვიანებისთვის, საცხოვრებელი სახლიდან და სხვა შენობა-ნაგებობიდან, გათვალისწინებული ჯარიმის რაოდენობა, ნაცვლად 100 ლარისა, 200 ლარით განისაზღვრება. იგივე ქმედება, ჩადენილი ავტოსატრანსპორტო საშუალებიდან, გამოიწვევს მძღოლის, ხოლო საზოგადოებრივი ტრანსპორტის შემთხვევაში – დამრღვევის დაჯარიმებას 120 ლარის ნაცვლად, – 250 ლარით.

ხუთამდე საბურავით (გარდა ველოსიპედის საბურავისა) გარემოს დანაგვიანებისას, დამრღვევი 150 ლარის ნაცვლად 500 ლარით; ხოლო ხუთზე მეტი საბურავით გარემოს დანაგვიანების შემთხვევაში – 500 ლარის ნაცვლად 2000 ლარით დაჯარიმდება.

2 კგ-მდე ბატარეის, აკუმულატორის, ელექტრონათურის, ელექტროსაქონლის,

გრაფიტის ელექტროდის, ბასრი ან მჩხვლეტავი საგნის (მათ შორის, შუშის ნამსხვრევის, ლურსმნის ან სხვა მსგავსი საგნის) ნარჩენით გარემოს დანაგვიანებისთვის სამართალდამრღვევი, ნაცვლად 100 ლარისა, 500 ლარით დაჯარიმდება.

2 კგ-ზე მეტი მუნიციპალური ნარჩენით გარემოს დანაგვიანებისთვის ფიზიკურ პირთათვის განსაზღვრული 150-ლარიანი ჯარიმა 500 ლარამდე  იზრდება, ხოლო იურიდიული პირი, იგივე ქმედების ჩადენისთვის, 1500 ლარით დაჯარიმდება, ნაცვლად 1000 ლარისა.

დიდი მოცულობის ნარჩენით გარემოს დანაგვიანების შემთხვევაში ფიზიკურ და იურიდიულ პირებს დაეკისრებათ გათვალისწინებულზე 4-ჯერ მეტი ჯარიმა – ფიზიკურ პირს – 2000 ლარის ოდენობით, ხოლო იურიდიულ პირს – 6000 ლარის ოდენობით.

ჯარიმები იზრდება სამშენებლო ან სხვა ინერტული ნარჩენით გარემოს დანაგვიანებისთვის. თუ ასეთი ნარჩენები 1 კბმ-მდე მოცულობისაა, ფიზიკური პირი 200 ლარის ნაცვლად 500 ლარით დაჯარიმდება, ხოლო იურიდიული პირი – 500 ლარის ნაცვლად – 2000 ლარით.

თუ სამშენებლო ნარჩენების რაოდენობა 1 კბმ-ს აღემატება, ფიზიკური პირის ჯარიმა 500 ლარიდან 1500 ლარამდე იზრდება, იურიდიული პირის – 1500 ლარიდან 3 000 ლარამდე.

კანონპროექტის ავტორები პარლამენტის წევრები გოგა გულორდავა და სულხან მახათაძე არიან.

ამ ცვლილებების საპარლამენტო კომიტეტებში განხილვა მარტში იგეგმება, პარლამენტის პლენარულ სხდომაზე განხილვა კი, სავარაუდოდ, აპრილის დასაწყისში დასრულდება.