ჩხერიმელამ, ხარაგაულის აგრარული ბაზრის მიმდებარე ტერიტორიასთან, მდინარისაგან დამცავი კედელი ჩამოშალა და ელექტროენერგიის გადამცემ ორ საყრდენს ძირი გამოუთხარა.

ამის გამო ელექტროენერგიის მიწოდება შეუწყდათ დაბა ხარაგაულში რიყისა და რკინიგზის უბნების, სოფელ ჩხერის, ჯაფაროულის და ბაზალეთის რკინიგზის მიმდებარედ მცხოვრებ მოსახლეობას.

მიმდინარეობს აღდგენითი სამუშაოები. ამ წუთებში ორივე ელექტროსაყრდენი საავტომობილო გზის მეორე მხარეს გადააქვთ.

„ენერგო-პრო ჯორჯიას“ დასავლეთ საქართველოს ცენტრალური ფილიალის საზოგადოებასთან ურთიერთობის სამსახურის უფროს თეონა გეგუჩაძის ინფორმაციით, აბონენტებს ელექტროენერგიის მიწოდება დღის ბოლომდე აღუდგებათ.