უმუშევრობის დახმარების შემოღების ინიციატივით პარლამენტარმა გუგული მაღრაძემ ჯანმრთელობისა და სოციალური დაცვის მინისტრს, ეკატერინე ტიკარაძეს, მიმართა.

კონკრეტულად რას გულისხმობს დეპუტატი უმუშევრობის დახმარებაში – „ჩემი ხარაგაულის“ ამ შეკითხვაზე გუგული მაღრაძე გვპასუხობს:

-სოციალური შემწეობა ექნება იმას, ვიზეც დადგინდება, რომ მუშაობა ნამდვილად არ შეუძლია – ავად არის, წვრილშვილიანია, ასაკოვანია და სხვ.

საქართველოში 46 ათასი შრომისუნარიანი ადამიანი სოციალურ დახმარებას იღებს. წარმოიდგინეთ, ჯან-ღონით სავსე კაცი, თვიდან თვემდე, წლებია, სოციალურ დახმარებას ელოდება. ეს ფსიქოლოგიურად პიროვნებას დემოტივირებულს ხდის. 20 წლის კაცს რომ შემწეობა დაენიშნა და 20 წლის შემდეგაც იგივე მდგომარეობაშია, ეს დამანგრეველია.

ამიტომ უნდა გავყოთ, – სოციალური შემწეობა მივცეთ იმას, ვისაც ნამდვილად სჭირდება შემწეობა, უმუშევრობის დახმარება დავუნიშნოთ შრომისუნარიან იმ პირებს, რომლებიც კონკრეტულ მომენტში ვერ მუშაობენ, მაგრამ სამუშაოს აქტიურად ეძებენ.

უმუშევრობის დახმარება შეიძლება იყო სამთვიანი, ექვსთვიანი, ერთწლიანი. ამ პერიოდის განმავლობაში სახელმწიფომ უმუშევრობის დახმარების მიმღებ პირს უნდა შესთავაზოს უფასო გადამზადების კურსები იმ პროფესიებში, რა პროფესიითაც შეიძლება დასაქმდეს. მთელ მსოფლიოში ასეა, – იმუშავა ადამიანმა ორი წელი, მერე დაკარგა სამსახური, ახალი სამსახურის შოვნამდე, მას უმუშევრობის დახმარება ეძლევა.

ეს წინადადება მთავრობას განსჯისთვის მივაწოდე, რომ იფიქრონ სოციალური ფონის გაჯანსაღებაზე.

ვრცლად პარლამენტარის ინიციატივას გაეცანით გაზეთში „ჩემი ხარაგაული“.

ნინო კაპანაძე