ხარაგაულის მუნიციპალიტეტის 2020 წლის ბიუჯეტის პროექტით ხარაგაულის სკოლამდელ დაწესებულებათა გაერთიანების სუბსიდია 91 ათასი ლარით იზრდება.

ამის შესახებ ხარაგაულის მუნიციპალიტეტის მერიის საფინანსო-საბიუჯეტო სამსახურის უფროსმა ვლადიმერ გელაშვილმა საკრებულოს ბიუროს 16 დეკემბრის სხდომაზე ისაუბრა.

ვლადიმერ გელაშვილის ინფორმაციით, საბავშვო ბაღებში აღმზრდელებისთვის ხელფასების ზრდა 2020 წლის სექტემბრიდან იგეგმება.

„ხელფასები 100-100 ლარით გაიზრდება, მაგრამ არა ყველა აღმზრდელის, – ამბობს ვლადიმერ გელაშვილი, – ზოგი აღმზრდელი დამატებით 100 ლარს მიიღებს, ზოგი – 70 ლარს, ზოგი – 50 ლარს. ეს დამოკიდებული იქნება ჯგუფში აღსაზრდელთა რაოდენობაზე. ის აღმზრდელი, რომელსაც 5 ბავშვი ჰყავს ჯგუფში და ის, ვისაც – 25, ერთნაირ ანაზღაურებას არ უნდა იღებდნენ. ფინანსთა სამინისტროში ბიუჯეტის პროექტის განხილვისას გვითხრეს, რომ ეს საკითხი სკოლამდელ დაწესებულებათა გაერთიანებამ თავად უნდა დაარეგულიროს“.