2019 წლის 10 დეკემბერს საქართველოს სახალხო დამცველი, საქართველოს პრემიერ მინისტრის მრჩეველი ადამიანის უფლებათა დარგში, ევროკავშირის, ევროპის საბჭოსა და გაერთიანებული ერების ორგანიზაციის წარმომადგენლები ადამიანის უფლებათა დაცვის დღეს აღნიშნავენ და ამით ასრულებენ ადამიანის უფლებათა კვირეულს, რომელიც ყოველწლიურად აღინიშნება მთელს მსოფლიოში.

ღონისძიება გაიმართება სამშაბათს, 10 დეკემბერს, 13:30-15:00 საათზე, რუსთაველის მეტროს მიმდებარე ტერიტორიაზე.

ღონისძიებაზე სიტყვით გამოვლენ:

  • ნინო ლომჯარია, საქართველოს სახალხო დამცველი;
  • ლელა აქიაშვილი, საქართველოს პრემიერ-მინისტრის მრჩეველი ადამიანის უფლებათა დარგში;
  • კარლ ჰარცელი, ევროკავშირის ელჩი საქართველოში;
  • კრისტიან ურსე, ევროპის საბჭოს ოფისის ხელმძღვანელი საქართველოში;
  • ვლადიმერ შკოლნიკოვი, გაეროს ადამიანის უფლებათა უმაღლესი კომისრის ოფისის უფროსი მრჩეველი.
ღონისძიება, რომელიც წელს „ახალგაზრდები ადამიანის უფლებათა დასაცავად“ სლოგანის ქვეშ იმართება ასევე მოიცავს აქტივობებს, რომელიც მიმართულია საზოგადოებისათვის ადამიანის უფლებების შესახებ ინფორმაციის მიწოდებაზე.

ადამიანის უფლებათა დღე
ადამიანის უფლებათა საერთაშორისო დღე ყოველწლიურად 10 დეკემბერს აღინიშნება. ეს თარიღი 1948 წელს დამკვიდრდა, როცა დიდი მსოფლიო ომის შემდეგ ქვეყნებმა ერთობლივად მიიღეს ადამიანის უფლებათა საყოველთაო დეკლარაცია – დოკუმენტი, რომელიც აწესებს ადამიანის თანდაყოლილ და ხელშეუხებელ უფლებებს. წინა მსოფლიო ომების გამოცდილების შემდეგ ეს პირველი შემთხვევა იყო, როცა ქვეყნები ხელშეუხებელი უფლებების ერთიან დოკუმენტში ასახვაზე შეთანხმდნენ. 2019 წელს, ადამიანის უფლებათა დღე აღინიშნება სლოგანით: „ახალგაზრდები ადამიანის უფლებების დასაცავად“.

ევროკავშირის მხარდაჭერა ადამიანის უფლებათა დაცვის კუთხით საქართველოში
ევროკავშირი დაფუძნებულია მტკიცე განზრახვაზე ხელი შეუწყოს და დაიცვას ადამიანის უფლებები, დემოკრატია და კანონის უზენაესობა, როგორც ევროპის ქვეყნებში, ასევე მთელ მსოფლიოში. მდგრადი მშვიდობა, განვითარება და კეთილდღეობა ვერ იარსებებს ადამიანის უფლებათა პატივისცემის გარეშე.

ევროკავშირი საქართველოში სხვადასხვა სახელმწიფო, არასამთავრობო, საერთაშორისო თუ სამოქალაქო საზოგადოების ორგანიზაციებთან ერთად, მხარს უჭერს ადამიანის უფლებების დაცვას საქართველოში.