ხარაგაულის სპორტისა და შიდა ტურიზმის ცენტრის დირექტორის, გრიგოლ ჭიპაშვილისგან მოპოვებული ინფორმაციით, 3 ივლისს ხარაგაულში ნოდარ ახალკაცის სახელობის თასზე ფეხბურთის ჩემპიონატი იწყება.

ტურნირში მონაწილეობენ – დაბა ხარაგაულის, ლაშეს, ვახანის, ვარძიის, კიცხის, ხიდრის, ბორითისა და ღორეშის გუნდები.

3 ივლისს ხარაგაულის სტადიონზე 16:00 საათზე ერთმანეთს შეხვდებიან – დაბა ხარაგაულისა და კიცხის გუნდები; 18:00 საათზე – ლაშისა და ვარძიის გუნდები;

4 ივლისს 16:00 საათზე – ხიდარისა და ვახანის, 18:00 საათზე ბორითისა და ღორეშის საფეხბურთო გუნდები.

25-30 ივლისს ზვარეში კარვების ბანაკის მოწყობა იგეგმება. ზვარეში სპორტისა და შიდა ტურიზმის ცენტრის მიერ ორგანიზებული კონკურსის – „ვიცნობდეთ ხარაგაულს“ ფინალისტი ხუთი სკოლის გუნდის მოსწავლეები დაისვენებენ.

გრიგოლ ჭიპაშვილი ამბობს, რომ ამ დრომდე, მოსწავლეთა სურვილის შესაბამისად, სპორტულ დარბაზში ვარჯიშებს სპორტსკოლაში მოქმედი ყველა წრე აგრძელებს.

ფოტოზე: ზვარის ბანაკი, 2016 წ.