საჯარო სკოლების ინფრასტრუქტურის მოწესრიგების ვალდებულება ცენტრალურმა ხელისუფლებამ ადგილობრივ თვითმმართველობებს გადასცა.

სკოლების შენობების მოსაწესრიგებლად ხარაგაულის მუნიციპალიტეტმა ცენტრალური ბიუჯეტიდან 410 ათასი ლარი 2019 წლის თებერვალში მიიღო.

თუმცა, როგორც ხარაგაულის მუნიციპალიტეტის საკრებულოს განათლების, კულტურის, სპორტისა და ახალგაზრდულ საქმეთა კომისიის თავმჯდომარე დავით კიკნაძე ამბობს, ამ დრომდე არც ერთი პროექტი არ მომზადებულა.

ეს ინფორმაცია დავით კიკნაძეს დღეს, 17 სექტემბერს, საკრებულოს ბიუროს სხდომაზე მერიის კეთილმოწყობისა და ინფრასტრუქტურის სამსახურის მთავარმა სპეციალისტმა პეტრე შარიქაძემ დაუდასტურა.

ხარაგაულის საგანმანათლებლო რესურსცენტრის უფროს მარინე ვეფხვაძესგან მოპოვებული ინფორმაციით, ცენტრალური ბიუჯეტიდან მიღებული თანხით იგეგმება:

  • ხარაგაულის #3 საჯარო სკოლის შენობის სახურავის, კარ-ფანჯრების, იატაკისა და შიდა კიბის რეაბილიტაცია;
  • თეთრაწყაროს სკოლაში – იატაკის დაგება, სველი წერტილის მოწესრიგება და მცირე კოსმეტიკური რემონტი;
  • მოლითის საჯარო სკოლის შენობის გადახურვა.

მარინე ვეფხვაძე ამბობს, რომ თუ თანხა დარჩება, იმ სკოლებში, სადაც ამის პრობლემაა, სველ წერტილებს მოაწესრიგებენ.

ფოტოზე: ხარაგაულის #3 საჯარო სკოლა