საბიბლიოთეკო კვირეულის ფარგლებში დღეს, 3 მაისს, ხარაგაულის საბავშვო ბიბლიოთეკაში საბავშვო მწერალ გივი ჩიღვინაძესთან შეხვედრა გაიმართა.

ღონისძიებაში დაბა ხარაგაულში მოქმედი სამივე სკოლის მეოთხე კლასის მოსწავლეები მონაწილეობდნენ. მათ მწერლის შემოქმედებიდან ლექსები, ნაწყვეტები და ლექსად გამოთქმული გამოცანები (რითმოცანები) წაიკითხეს.

მწერალმა მოსწავლეების მიერ დასმულ შეკითხვებს უპასუხა და ბიბლიოთეკას საჩუქრად თავისი და კოლეგების წიგნები გადასცა.

გივი ჩიღვინაძე თვლის, რომ მსგავსი შეხვედრები ყველა სკოლაში აუცილებელია, რადგან რეგიონებში მოსწავლეებს ცოცხალი მწერლები ნანახი არ ჰყავთ.

„თანამდეროვე საბავშვო მწერლების შემოქმედებას ნაკლებად იცნობენ არა მხოლოდ მოსწავლეები, არამედ პედაგოგები, – – ამბობს მწერალი, – რეგიონებში სკოლებსა და ბიბლიოთეკებს ახალი წიგნები არ მიეწოდებათ. თბილისში სკოლებში ხშირად ვხვდებით მოსწავლეებს. ვთვლი, რომ რეგიონებში მცხოვრები მოსწავლეები თბილისელ თანატოლებს არაფრით ჩამოუვარდებიან, ზოგჯერ პირიქით – უფრო ნიჭიერები და ინფორმირებულები არიან“.

საქართველოს პარლამენტის ეროვნული ბიბლიოთეკისა და საქართველოს საბიბლიოთეკო ასოციაციის ერთობლივი ორგანიზებით – საბიბლიოთეკო კვირეული 2019 –  30 აპრილს დაიწყო.

ხარაგაულში საბიბლიოთეკო კვირეული ლეღვნის სასოფლო ბიბლიოთეკაში მუხრან მაჭავარიანის 90 წლის იუბილესთან დაკავშირებული ღონისძიებით გაიხსნა.

კვირეულის განმავლობაში ხარაგაულის ბიბლიოთეკის ყველა განყოფილებაში სხავადასხვა ღონისძიებები გაიმართება.

  • ცენტრალური ბიბლიოთეკა პროექტის – „შეხვედრა ცნობილ ადამიანებთან“ – ფარგლებში იწვევს ქართველოლოგ ტარიელ ფუტკარაძეს. გაიმართება მისი წიგნის – „ქართველოლოგიის თანამედროვე გამოწვევები“ – პრეზენტაცია.
  • პატარა ხარაგაულის ბიბლიოთეკა გამართვას ღონისძიებას – „ღმერთო, სამშობლო მიცოცხლე“;
  • ხიდრის, მარელისის, თეთრაწყაროს, ნადაბურის, კიცხის, ღორეშის, მოლითის, წიფის, ვახანისა და ვერტყვიჭალის ბიბლიოთეკები კვირეულის ფარგლებში მუხრან მაჭავარიანის, ხოლო ბორითისა და ხევის ბიბლიოთეკები შოთა ნიშნიანიძის საიუბილეო საღამოებს გამართავენ;
  • წყალაფორეთისა და საბის ბიბლიოთეკები პოეტ ანა კალანდაძეს გაიხსენებენ;
  • პატრიოტულ თემებზე გამართავენ ღონისძიებას ვარძიისა და ზვარეს ბიბლიოთეკები;
  • ბაზალეთისა და საღანძილის ბიბლიოთეკებში თემატური საღამოები – „წიგნი ჩემი ცხოვრების თანამგზავრია“ და „ჩვენ ვკითხულობთ წიგნებს“ – გაიმართება;
  • ფარცხნალისა და სარგვეშის ბიბლიოთეკა სამი თაობის აქტიურ მკითხველებს უმასპინძლებს.

კვირეულის ფარგლებში ხარაგაულის საბავშვო ბიბლიოთეკა აქტიურ მკითხველებს ექსკურსიით დააჯილდოებს.

საბიბლიოთეკო კვირეული – 2019 დევიზით „ბიბლიოთეკა, როგორც არაფორმალური განათლების ცენტრი“ მიმდინარეობს.