1989 წლის 9 აპრილი… ამ დღეს ადამიანებს, რომლებსაც სურდათ სამშობლოს ბედნიერება და თავისუფლება, სასტიკად გაუსწორდნენ. მას შემდეგ 25 წელი გავიდა. იმ ღამით დაღუპული, გმირებად ქცეული მშვიდობიანი მომიტინგეების სახელები კი თაობიდან თაობას გადაეცემა.

9 აპრილს ხარაგაულელებმა 9 აპრილის სახელობის სკვერში პატივი მიაგეს დაღუპულთა ხსოვნას და გაიხსენეს სამშობლოს დამოუკიდებლობისთვის ბრძოლის დღეები.

9 აპრილისადმი მიძღვნილი ღონისძიება კულტურის სამსახურის უფროსმა ირინე ჩხეიძემ გახსნა. „ამ დღეს ჩვენ დავიბრუნეთ სამშობლო. ჩვენ პასუხისმგებლები ვართ იმ ადამიანების წინაშე, ვინც სიცოცხლე შესწირა სამშობლოს თავისუფლებას, – აღნიშნა 9 აპრილის მონაწილემ, ხარაგაულის მაჟორიტარმა დეპუტატმა ნოდარ ებანოიძემ.

„ეს დღე ერთ-ერთი მნიშვნელოვანია საქართველოს ისტორიაში. სწორედ ამ დღეს მოხდა ქართველთა ცნობიერებაში გარდატეხა. სწორედ ამ დღის დამსახურებაა ის, რომ ახლა საქართველო დამოუკიდებელი ქვეყანაა.  ასევე 9 აპრილს გამოცხადდა საქართველო დამოუკიდებელ სახელმწიფოდ, – აღნიშნა 9 აპრილის მონაწილე პაატა გოგოლაძემ.

ხარაგაულის მუნიციპალიტეტის გამგებელმა კობა ლურსმანაშვილმა იმედი გამოთქვა, რომ ეს დღე ჩვენი მომავალი თაობებისთვის სტიმულის მომცემი იქნება: „მაშინ ქართველები ვიბრძოდით დამოუკიდებლობისთვის და ეს ბრძოლა წარმატებით დაგვირგვინდა. ვისურვებ, საქართველოს მომავალიც ასეთი წარმატებული ყოფილიყოს.“

ღონისძიების დასასრულს რიკოთის წმინდა გიორგის სახელობის მამათა მონასტრის წინამძღვარმა მამა პახუმმა  9 აპრილს დაღუპულთა სულებისათვის მოსახსენიებელი პარაკლისი აღავლინა.

ღონისძიების შემდეგ ხარაგაულის ისტორიულ მუზეუმში ნიკოლოზ მაჭავარიანმა ისაუბრა ამ დღის მნიშვნელობაზე და გაიმართა ფილმის „9 აპრილიდან 9 აპრილამდე“ ჩვენება.

თამთა გოგოლაძე

9_April_(7) 9_April_(6) 9_April_(5)  9_April_(3) 9_April_(2) 9_April_(1)