რამდენიმე წუთის წინ დაბა ხარაგაულსა და მიმდებარე სოფლებს ბუნებრივი აირის მოწოდება შეუწყდათ.

ჩვენ დავუკავშირდით „სოკარ ჯორჯია გაზის“ ზესტაფონის სერვისცენტრის მენეჯერს ლევან აბაშიძეს.

„ძირულა-ხარაგაულის მაგისტრალზე, სადაც მიმდინარეობს საავტომობილო გზის მშენებლობა, მშენებელმა კომპანიამ დაგვიზიანა ცენტრალური გაზსადენი, სადანაც ხარაგაული ბუნებრივი აირით მარაგდება, – განაცხადა ჩვენთან საუბარში ლევან აბაშიძემ, – გათიშულია მთელი ხარაგაული.

აღდგენითი სამუშაოები მიმდინარეობს. სავარაუდოდ, ერთ საათში დავამთავრებთ და მომხმარებლებისთვის ეტაპობრივად მიწოდებას დავიწყებთ. იქნებ მოვახერხოთ, რომ დაბა ხარაგაულის აბონენტებს მივაწოდოთ. სოფლებს ამაღამ ბუნებრივ აირს ვერ მივაწვდით“.