ხარაგაულის საგანმანათლებლო რესურსცენტრის პედაგოგის, თინათინ ბოჭორიშვილის ინფორმაციით, საატესტატო გამოცდებისთვის მეთორმეტე კლასელების რეგისტრაცია 15 აპრილამდე გრძელდება. ამჟამად, საჭიროების შემთხვევაში, შესაძლებელია განაცხადში რედაქტირება. ცოტა მოგვიანებით პროგრამას ექნება ამობეჭდვის რეჟიმი და სკოლების დირექტორებმა მოსწავლეების მიერ ხელმოწერილი დოკუმენტი რესურსცენტრში უნდა წარადგინონ. მათ, ვინც სასწავლო წლის დასაწყისში ჩაიჭრა გამოცდებზე, ან სხვა რაიმე მიზეზით ვერ ჩააბარა, სისტემაში შესვლისას შეიტყობს დაწვრილებით ინფორმაციას.

რაც შეეხება მასწავლებელთა სასერტიფიკაციო გამოცდებისთვის რეგისტრაციას, იმ პედაგოგებისთვის, რომელთაც რეგისტრაცია ელექტრონულად გაიარეს, მაგრამ დოკუმენტურად განაცხადი არ შეუვსიათ, ვადა 4 აპრილამდე გაგრძელდა.