სოფლის მხარდაჭერის პროგრამის დაფინანსება გაორმაგდა. ამის შესახებ ინფორმაცია რეგიონული განვითარებისა და ინფრასტრუქტურის სამინისტრომ გაავრცელა.

მინისტრის, მაია ცქიტიშვილის ინფორმაციით, სოფლის კრებებზე პროგრამის გაზრდის საჭიროება გამოიკვეთა. ამიტომ 20 მილიონი ლარის ნაცვლად, სხვადასხვა მცირე მასშტაბის პროექტებზე, 40 მილიონი ლარი დაიხარჯება. შესაბამისად გაორმაგდა თანხა თითოეული სოფლისთვის.

ხარაგაულის მუნიციპალიტეტმა რეგიონული განვითარების ფონდიდან სოფლის მხარდაჭერის პროგრამის დაფინანსებისთვის 430 000 ლარი უკვე მიიღო. მერის პირველი მოადგილის, არჩილ მაღრაძის ინფორმაციით, უახლოეს ხანში ამდენივე ოდენობის თანხას ელოდებიან.

ხარაგაულის მუნიციპალიტეტის სოფლებში კრებები პირველი თებერვლიდან დაიწყო. ამ დროისთვის კრება 19 სოფელში ჩატარდა. აქედან 9 სოფელში, სხვა საკითხებთან ერთად, მოსახლეობამ წყლის სისტემების მოწესრიგება მოითხოვა.

  • გარე განათებები მოეწყობა ბაზალეთში, წიფში, ღარიხევში, ქროლში, მოლითსა და ღვერკში;
  • გზები მოწესრიგდება ლაშეში, ლაშის იგორეთში, ბაბში, ანეულაში, ჭარტალში, ბეჟათუბანში, ქვებში, დეისსა და ღვერკში;
  • წიფში, ღარიხევში, საქარიქედში, კიცხის იგორეთში, თეთრაწყაროში, უჩამეთში, ლაშეში, მოლითსა და ნებოძირში მოსახლეობა წყლის სისტემის მოსაწესრიგებლად ავზისა და მილების შეძენას, ასევე ჭაბურღილის მოწყობას ითხოვს;
  • მოსახლეობის გადაწყვეტილებით, სასაფლაოები შემოიღობება ჭარტლსა და ნებოძირში;
  • თავშეყრის ადგილები მოეწყობა ქვებში, ნებოძირსა და დეისში;
  • წისქვილები მოწესრიგდება მოლითსა და ღვერკში;
  • სარიტუალო დარბაზებისთვის ინვენტარია შესაძენი მოლითში, დეისსა და ქვებში;
  • სანიაღვრე არხი უნდა მოეწყოს მოლითში.

სოფლის მხარდაჭერის პროგრამის ფარგლებში მოსახლეობის კრებები ხარაგაულის მუნიციპალიტეტში 28 თებერვალს დასრულდება. მოსახლეობის მიერ შერჩეულ პროექტებს საკრებულო დაამტკიცებს.

ნინო კაპანაძე

ფოტოზე: მოსახლეობის კრება ღარიხევში