ხარაგაულის ინოვაციების ცენტრში 5 თებერვალს, უსაფრთხო ინტერნეტის მსოფლიო დღესთან დაკავშირებით, ახალგაზრდებისთვის ტექნოპარკიდან პირდაპირი ჩართვა განხორციელდა.

კიბერუსაფრთხოების საგანმანათლებლო კვლევითი ცენტრის დამფუძნებელმა ანდრო გოცირიძემ ახალგაზრდებს კიბერჰიგიენის საბაზისო კურსი გააცნო.

-თუ ადრე დანაშაული ხდებოდა რეალურ სივრცეში – ქუჩაში, ავტობუსში, სადარბაზოში, ახლა კრიმინალმა ონლაინ სამყაროში  გადაინაცვლა, – აღნიშნა ანდრო გოცირიძემ – არსებობს საფრთხეები, რომლებიც შეიძლება დაემუქროს თქვენს ინტერნეტთან წვდომის მოწყობილობებს. ერთ-ერთი ასეთი საფრთხე ვირუსია.

თქვენი კომპიუტერის ან ტელეფონის დავირუსება ყველაზე ხშირად შეიძლება გამოიწვიოს არასაიმედო ლინკზე გადასვლამ, ან უცნობი ფაილის ჩამოტვირთვამ. არსებობს დავირუსებული კომპიუტერის რამდენიმე დამახასიათებელი ნიშანი:

  • წაიშალა თქვენი პირადი ინფორმაცია, რაც გქონდათ შენახული კომპიუტერში;
  • კომპიუტერი მუშაობს შენელებულად აპლიკაციების გაშვებისას ან პროგრამების გახსნისას;
  • ერთ საიტზე შესვლისას ერთად იხსნება რამდენიმე ფანჯარა;
  • მთავარ გვერდს შეცვლილს გიჩვენებთ;
  • თქვენს კომპიუტერზე error შეტყობინებები გახშირდა.

ანდრო გოცირიძის თქმით, არასაიმედოა ფაილი ან ლინკი სკანდალური სათაურით, ან თუ რომელიმე აპლიკაცია მომხმარებლის პირად მონაცემებს ითხოვს.

როგორ დავიცვათ კიბერუსაფრთხოება:

  • ყოველთვის განაახლეთ კომპიუტერისა და ტელეფონის პროგრამული უზრუნველყოფა;
  • შექმენით თქვენი პირადი მონაცემების სარეზერვო ასლები;
  • საეჭვო ფაილები წაშალეთ;
  • გამოიყენეთ რვა ან მეტი სიმბოლოსაგან შექმნილი პაროლები;
  • არავის გაანდოთ თქვენი კომპიუტერის, ტელეფონის, ელფოსტის თუ სოციალური ქსელის პაროლები;
  • ნუ გამოიყენებთ პაროლად თქვენი, თქვენი მეგობრის, მშობლის სახელს, თქვენი დაბადების თარიღსა და მარტივ ციფრულ კომბინაციებს.

კიბერდანაშაულის ნებისმიერ შემთხვევაში აცნობეთ შინაგან საქმეთა სამინისტროს ცხელ ხაზს 112.

თამთა გოგოლაძე