ინტელექტუალური კონკურსის „ვიცნობდეთ ხარაგაულს“ ფინალი დღეს, 24 დეკემბერს, ხარაგაულის კინოთეატრში გაიმართა.

ფინალურ შეხვედრაში ხარაგაულის გიმნაზიის გუნდმა გაიმარჯვა. შეჯიბრებაში ზონალურ ტურებში გამარჯვებული სკოლების (ხარაგაულის გიმნაზიის, ვერტყვიჭალის, ბორის, მოლითის) გუნდებთან ერთად საუკეთესო შედეგის მქონე მეორე ადგილის მფლობელი მარელისის სკოლის გუნდი მონაწილეობდა.

ფინალური თამაში ხუთი ეტაპისაგან შედგებოდა. მონაწილეების შედეგებს სპეციალური ჟიური აფასებდა შემდეგი შემადგენლობით – მამუკა ჭიპაშვილი, ნინო დიდიძე, იზა ვეფხვაძე, მარინა ვეფხვაძე.

კონკურსი „ვიცნობდეთ ხარაგაულს“ ხარაგაულის სპორტისა და ტურიზმის ცენტრის, საგანმანათლებლო რესურსცენტრის, კულტურისა და ხელოვნების ცენტრის ორგანიზებით ჩატარდა.

გამარჯვებული გუნდები ორგანიზატორებისგან საჩუქრებით დაჯილდოვდნენ. ფინალური თამაშის ყველა მონაწილე ხარაგაულის სპორტისა და ტურიზმის ცენტრის ინიციატივით ზვარეს საზაფხულო ბანაკში ერთი კვირით დაისვენებს.

კონკურსი სიმღერით გაალამაზეს ხარაგაულის გიმნაზიის მოსწავლეებმა თამარ ლურსმანაშვილმა და მარიამ მანჯავიძემ.