16-22 სექტემბერს ქუთაისის მელიტონ ბალანჩივაძის სახელობის ოპერისა და ბალეტის პროფესიულ სახელმწიფო თეატრში გაიმართება ქუთაისის პირველი საერთაშორისო საოპერო ფესტივალი.

ფესტივალი ქუთაისის მ. ბალანჩივაძის სახელობის ოპერისა და ბალეტის პროფესიული სახელმწიფო თეატრისა და საზღვარგარეთ მოღვაწე ქართველი მომღერლის – დავით ღვინიანიძის საერთაშორისო ფონდის – „მსოფლიო ტალანტების“ ერთობლივი პროექტია. ფესტივალის მხარდამჭერები არიან ქუთაისის მუნიციპალიტეტის მერია და ააიპ ქუთაისის კულტურულ დაწესებულებათა გაერთიანება.

ფესტივალის შემოქმედებითი სტუმრები იქნებიან საერთაშორისო აღიარების მქონე უცხოელი და ქართველი მუსიკოსები – თამარ ივერი, რაულ მელო, მარია პახარი, ლარისა ანდრეევა, ალექსანდრ კირეევი, კონსტანტინე სუჩკოვი, სულხან გველესიანი, მარიკა მაჩიტიძე, ირაკლი მურჯიკნელი, გიორგი ცინცაძე, აკაკი იოსელიანი.

მომღერლები მონაწილეობას მიიღებენ რუჯერო ლეონკავალოს „ჯამბაზებში“, ჯუზეპე ვერდის „ტრავიატაში“, პიეტრო მასკანის „სოფლის ღირსებაში“, კამერული მუსიკის საღამოში, ფესტივალის საზეიმო გალა-კონცერტში. ნიუ-იორკის „მეტროპოლიტენ-ოპერის“ სოლისტი რაულ მელო კი ახალგაზრდა მუსიკოსებისთვის მასტერ-კლასსაც ჩაატარებს.

ქუთაისის პირველი საერთაშორისო საოპერო ფესტივალის საბაზო კოლექტივია ქუთაისის ოპერის თეატრი – სოლისტები, გუნდი, ორკესტრი, ქორეოგრაფიული დასი. ფესტივალის მთავარი დირიჟორია რევაზ ჯავახიშვილი, მთავარი რეჟისორი – მაია გაჩეჩილაძე.

16 სექტემბერი – ფესტივალის საზეიმო გახსნა, რუჯერო ლეონკავალო „ჯამბაზები“.
17 სექტემბერი – ნიუ-იორკის მეტროპოლიტენ-ოპერის სოლისტის, რაულ მელოს მასტერ-კლასი;
18 სექტემბერი – ჯუზეპე ვერდი „ტრავიატა“;
19 სექტემბერი – კამერული მუსიკის საღამო;
20 სექტემბერი – რუჯერო ლეონკავალო „სოფლის ღირსება“;
22 სექტემბერი – საზეიმო გალა-კონცერტი – ფესტივალის დახურვა.

სპექტაკლები და კონცერტები 19 საათზე დაიწყება.