15 აგვისტოს ხარაგაულში ლატვიის ქალაქ ლიმბაჟის თეატრალური დასი ჩამოვა.

ლიმბაჟისა და ხარაგაულის სახალხო თეატრები 1990 წლიდან მეგობრობენ. ხარაგაულის თეატრი ლიმბაჟში თეატრალურ ფესტივალზე სამჯერ იმყოფებოდა.

ხარაგაულის მუნიციპალიტეტის მერიის კულტურის სამსახურის უფროსის, ირინე ჩხეიძის ინფორმაციით, 15 აგვისტოს 15:00 საათზე ხარაგაულის კინოთეატრში ლატვიელ სტუმრებს ადგილობრივი ხელისუფლების წარმომადგენლები შეხვდებიან. შემდეგ დაგეგმილია კონცერტი – ხარაგაულელი მოცეკვავეები ლატვიური და ქართული ეროვნული ცეკვებით წარსდგებიან სტუმრებისა და ხარაგაულელი მაყურებლის წინაშე, შესრულდება ქართული და ლატვიური ხალხური სიმღერები.

კონცერტის შემდეგ სტუმრები ხარაგაულის ისტორიულ მუზეუმს დაათვალიერებენ.

15 აგვისტოს 19:00 საათზე, ნაჩვენები იქნება ხარაგაულის ოთარ აბაშიძის სახელობის სახალხო თეატრის სპექტაკლი „ორნი“ (რეჟისორი ირინე ჩხეიძე).

სპექტაკლის შემდეგ თამაზ კიკნაძის სახელობის სკვერში ხარაგაულელი ახალგაზრდების მონაწილეობით კონცერტი ჩატარდება. სკვერში მოეწყობა ნანა კიკნაძის ნახატების, ნაქარგებისა და გობელენების გამოფენა.

16 აგვისტოს, 12:00 საათზე, ხარაგაულის შ. ბუაჩიძის სახელობის სამუსიკო სკოლაში დაგეგმილია კლასიკური მუსიკის კონცერტი; 18:00 საათზე ხარაგაულის კინოთეატრში ლიმბაჟის თეატრი გამართავს სპექტაკლს „ჩარლის ნათლია.“

17 აგვისტოს ლატვიელი სტუმრები ქუთაისის ღირშესანიშნავ ადგილებს მოინახულებენ, 18 აგვისტოს კი – ბორჯომ-ხარაგაულის ეროვნულ პარკს.