ხარაგაულში მშენებარე მაცხოვრის შობის საკათედრო ტაძრისთვის მაცხოვრის შობის ხატი დაიწერა. ხატმწერმა დავით აფაქიძემ ხატი მარგვეთისა და უბისის ეპისკოპოსის, მელქისედეკის (ხაჩიძე) ლოცვა-კურთხევით, ხარაგაულის მოძღვრის, არქიმანდრიტ ანტონის (სულთანიშვილი) და მრევლის შემოწირულობით დაწერა.

ხატი დღეს, 6 მაისს, ხარაგაულში მოაბრძანეს.

„ჩვენს თვალწინ იქმნება ხარაგაულის საკათედრო ტაძრის ისტორია, – აღნიშნა საკვირაო წირვის შემდეგ ხარაგაულის ეკლესიის მოძღვარმა მამა ანტონმა, – ეს ხატი ერთობის მაგალითია, ხარაგაულის მრევლის გამაერთიანებელი და მფარველი. მადლობა ყველას, ვინც წვლილი შეიტანა ხატის შექმნაში. ასე გავაგრძელოთ და ავავსოთ ტაძარი – ვისაც როგორ შეგვიძლია გამოვხატოთ სიყვარული ჩვენი ტაძრების მიმართ.“

საკათედრო ტაძრის მშენებლობის დასრულებამდე ხატი ხარაგაულის ანდრია პირველწოდებულის სახელობის სამლოცველოში განთავსდება.