მას შემდეგ, რაც ხარაგაულის მუნიციპალიტეტის მერიამ მუნიციპალური ააიპ-ების შეერთებაზე საკრებულოსგან თანხმობა მიიღო, მერიის ეკონომიკისა და ქონების მართვის სამსახურს ააიპ-ების ქონების აღრიცხვა დაევალა.

ეს ინფორმაცია მერიის ადმინისტრაციის სამსახურის იურიდიული განყოფილების უფროს ინგალურსმანაშვილისგან მოვიპოვეთ:

„ააიპ-ების ხელმძღვანელებმა მერიას კრედიტორული დავალიანებების შესახებ ინფორმაცია წარუდგინეს, ხოლო თანამშრომლები შესაძლო გათავისუფლების შესახებ გააფრთხილეს. თუ რაიმე ხარვეზი არ დაფიქსირდა, ააიპ-ების შერწყმის პროცესი საჯარო რეესტრში დოკუმენტების წარდგენიდან ათ სამუშაო დღეში დასრულდება. ამის შემდეგ შემუშავდება ახალი წესდება, დაინიშნებიან შერწყმული ააიპ-ების ახალი დირექტორები, რომლებიც ახალ წესდებებს დაარეგისტრირებენ საჯარო რეესტრში. რეორგანიზაციის შედეგად გათავისუფლებული თანამშრომლები, „შრომის კოდექსის“ თანახმად, საკომპენსაციო თანხას მიიღებენ.“

ინგა ლურსმანაშვილის ინფორმაციით, ხარაგაულში ააიპ-ების რეორგანიზაცია, სავარაუდოდ, აპრილის დასაწყისში დასრულდება.

ფოტოზე: ააიპ „შოთა ბუაჩიძის სახელობის ხარაგაულის სამუსიკო სკოლა“