რამდენიმე საათია, ძირულა-ხარაგაულის საავტომობილო გზაზე ავტომანქანები ვეღარ მოძრაობენ. სოფელ ლაშეში ადიდებულმა მდინარე ჩხერიმელამ გზა წაიღო. ცენტრალური ავტომაგისტრალიდან ხარაგაულისკენ მომავალი ავტომანქანები ზესტაფონი-კიცხი-ხარაგაულის გზით შემოდიან.

„ძალიან სერიოზული პრობლემის წინაშე ვართ, – ამბობს ხარაგაულის მუნიციპალიტეტის გამგებლის მოვალეობის შემსრულებელი არჩილ მაღრაძე, – საქმის კურსში ჩავაყენეთ რეგიონული განვითარებისა და ინფრასტრუქტურის სამინისტრო. გზის აღდგენითი სამუშაოები ჯერ არ დაწყებულა. უახლოეს დღეებში, სავარაუდოდ, გზა ისევ გადაკეტილი იქნება.“