ყოველ არჩევნებზე ხმების დათვლისას ბიულეტენების გარკვეული რაოდენობა ბათილად ცხადდება.

საარჩევნო კოდექსის მიხედვით, საარჩევნო ბიულეტენი ბათილია მხოლოდ იმ შემთხვევაში თუ:

  • ბიულეტენი დამოწმებული არ არის ამომრჩეველთა რეგისტრატორის ხელმოწერითა და ბეჭდით;
  • შეუძლებელია იმის დადგენა, რომელ საარჩევნო სუბიექტს მისცა ხმა ამომრჩეველმა (შემოხაზულია ერთზე მეტი სუბიექტი, გადახაზულია ყველა სუბიექტი და ა.შ.);
  • კონვერტში აღმოჩნდა დადგენილ რაოდენობაზე მეტი საარჩევნო ბიულეტენი;
  • სპეციალური კონვერტი არ არის დადგენილი ნიმუშის;
  • საარჩევნო ბიულეტენი საარჩევნო ყუთში აღმოჩნდა კონვერტის გარეშე;
  • საარჩევნო ბიულეტენი განკუთვნილი იყო სხვა საარჩევნო უბნისათვის.

„საერთაშორისო გამჭვირვალობა – საქართველომ“ 2016 წლის 8 ოქტომბრის არჩევნებზე მაჟორიტარული და პროპორციული და ასევე 2002 წლიდან დღემდე ჩატარებულ არჩევნებზე გაბათილებული ბიულეტენების სტატისტიკა გამოაქვეყნა.

ამ სტატისტიკის მიხედვით, 2016 წლის 8 ოქტომბრის არჩევნებზე ყველაზე მეტი ბიულეტენი (5, 98%) ახალქალაქის ოლქში გაბათილდა.

„საერთაშორისო გამჭვირვალობა – საქართველოს“ მიერ გამოქვეყნებული სტატისტიკის მიხედვით, ხარაგაული-ბაღდათის საარჩევნო ოლქში 2016 წლის 8 ოქტომბრის არჩევნებზე ბიულეტენების 2,87 % გაბათილდა.

ამ მონაცემით, ბაღდათი-ხარაგაულის ოლქი იმ საარჩევნო ოლქების ათეულშია, სადაც მცირე ოდენობით გაბათილებული ბიულეტენები დაფიქსირდა.

შოთა ლომიძის ფოტო